Brazil, e dyshuara për helmimin me tortë Krishtlindjesh gjendet e vdekur në burg

Një grua, e akuzuar për vrasjen e tre anëtarëve të së njëjtës familje duke i helmuar me një tortë Krishtlindjesh, është gjetur e vdekur në qelinë e saj të burgut në Brazil.

Deise Moura dos Anjos u gjet pa shenja jete gjatë një kontrolli në mëngjes në një burg shtetëror të grave në qytetin Guaíba, në shtetin jugor të Rio Grande do Sul.

Sipas CNN Brasil, autoritetet lokale konfirmuan vdekjen e saj të enjten.

“Sapo u zbulua, stafi i burgut i dha ndihmën e parë dhe thirri shërbimet emergjente, të cilat konfirmuan vdekjen e saj sapo mbërritën në vendngjarje,” thuhet në deklaratën e policisë kriminale.

Autoritetet theksuan se e dyshuara ndodhej e vetme në qeli dhe se rrethanat e vdekjes do të hetohen nga Policia Civile dhe Instituti i Ekspertizës.

Një ditë para vdekjes, bashkëshorti i saj, Diego dos Anjos, kishte kërkuar divorc.

Helmimi tragjik i tortës së Krishtlindjes

Ngjarja tragjike ndodhi në prag të Krishtlindjes në qytetin Torres, ku tre persona humbën jetën dhe tre të tjerë përfunduan në spital pasi konsumuan tortën e helmuar.

Sipas hetimeve, sasi të mëdha arseniku u gjetën në trupat e viktimave. Ekspertët zbuluan se mielli i përdorur për përgatitjen e tortës përmbante nivele arseniku 2,700 herë më të larta se kufiri i lejuar.

Deise Moura dos Anjos u arrestua në janar dhe u akuzua për vrasje të trefishtë dhe tre tentativa vrasjeje.

Ajo ishte nusja e një prej viktimave, 60-vjeçarit Zeli dos Anjos, i cili kishte përgatitur tortën fatale.

Sipas policisë, helmimi nuk ishte aksidental. Analizat laboratorike konfirmuan se arseniku ishte përzier qëllimisht në miellin e përdorur për përgatitjen e tortës, duke përjashtuar mundësinë e ndotjes natyrore ose aksidentale.

Hetuesit theksuan gjithashtu se Deise Moura dos Anjos kishte konflikte me familjen e viktimave për më shumë se dy dekada.

Detajet e analizave laboratorike

Sipas Institutit të Përgjithshëm të Ekspertizës, mostrat e marra nga trupat e viktimave treguan përqendrime tejet të larta të arsenikut.

Viktima me përqendrimin më të ulët të helmit kishte 80 herë më shumë arsenik se niveli i lejuar në ushqim, ndërsa viktima me përqendrimin më të lartë kishte 350 herë më shumë.

“Këto nivele janë aq të larta sa që është e pamundur të jenë rezultat i një ndotjeje të rastësishme,” deklaroi Marguet Mittmann, drejtoreshë e institutit.

Policia vazhdon hetimet për të zbardhur të gjitha rrethanat e këtij rasti tronditës.

LEXONI GJITHASHTU:

• Njeriu më i moshuar në botë, murgesha 117-vjeçare nga Brazili që adhuron futbollin
• “Torta vrasëse”, 3 gra vdesin pas darkës së Krishtlindjeve në Brazil, çfarë dyshohet