Carlo Ancelotti mbetet dëshira kryesore për 5 herë kampionët e botës, Brazilin, i cili ka nisur sërish bisedimet me italianin. Humbja ndaj Argjentinës nuk është kapërdirë dhe presidenca ka vendosur të ftojë teknikun e Realit të Madridit, që cilësohet shpëtimtar për ngërçin që ekipi po kalon.

Mediat braziliane bëjnë të ditur se Dorival Junior është jashtë planeve për Kupën e Botës 2026, ndaj Ancelotti konsiderohet si njeriu që mund ti bëjë ëndrrat realitet, fitimin e trofeut të 6-të.

Menjëherë pas ndeshjes me Argjentinën, përfaqësues të Federatës së Brazilit, të udhëhequr nga vetë kreu i saj kanë nisur të bindin Ancelottin, por kjo është një skemë e ditur tashmë. Më herët ka ndodhur e njëjta gjë, me presidentin e federatës Ednaldo Rodrigues i cili e bëri fakt të kryer që Ancelotti do të ishte trajneri i tyre, por kjo gjë nuk ndodhi, e nuk dihet në ka gjasa të arrihet këtë herë.

Kontrata e Carlo Ancelottit me galaktikët përfundon në vitin 2026, por do të ishte shumë vonë për të marrë drejtimin e Selesaos për shkak se nis menjëherë Kupa e Botës. Në këtë pikë po punohet që ai ti bashkohet ekipit menjëherë këtë verë, për të aplikuar planin e tij dhe pse jo, për të bërë mirë në kompeticionin më madhor për shtetet.

Ndër të tjera thuhet se dhe vetë Ancelotti dëshiron që të jetë trajner i Brazilit, por problemet që federata në fjalë ka pasur bënë që herën e parë gjithçka të pezullohej.

LEXONI GJITHASHTU:

• Argjentina deklasifikon dokumentet për ‘kanalet e minjve’ nazistë
• Kryeministri polak njofton pezullimin e kërkesave të emigrantëve për azil