Bullgarët në Pustec: Mbështesim Shqipërinë në Bashkimin Evropian

Andrei Kovachev, kryetar i Komisionit Parlamentar të BE-së për antarësimin e Ballkanit Perëndimor, vlerësoi procesin e integrimit si një hap jetik për të dyja palët.

Ndërkaq,  ai theksoi rëndësinë e pranimit sa më të shpejtë të vendeve të rajonit, bazuar në meritat dhe përparimin e reformave të tyre.

Kovachev e konsideron Shqipërinë dhe Malin e Zi si vendet më të avancuara në procesin e negociatave me Bashkimin Europian, duke shprehur shpresën që disa vende të Ballkanit Perëndimor, përfshirë Shqipërinë, të bëhen anëtare të plotë në vitet e ardhshme. Ai nënvizoi nevojën për kapërcimin e dallimeve historike, përforcimin e marrëdhënieve fqinjësore dhe lehtësimin e lëvizjes dhe bashkëpunimit ndër-rajonal.

“Shqipëria është një nga shoqëritë më pro-evropiane dhe euroatlantike. Kur shumica dhe opozita bashkohen për këtë çështje, anëtarësimi në BE bëhet realitet,” tha Kovachev.

Ai bëri thirrje që Maqedonia e Veriut të fillojë negociatat për antarësim, duke garantuar se Bullgaria nuk ka pengesa ndaj saj.

“Ne, si Republikë e Bullgarisë, nuk kemi pasur kurrë problem me emrin Republika e Maqedonisë dhe Bullgaria në asnjë mënyrë nuk e pengon anëtarësimin europian të Maqedonisë. Përkundrazi, ne e mbështesim fuqimisht që vendi të ecë përpara. Kjo nënkupton edhe përfshirjen e komunitetit bullgar në Kushtetutë, njësoj si të gjitha komunitetet e tjera përbërëse të shtetit. Gjithashtu kërkojmë që të mos ketë diskriminim ndaj atyre që deklarojnë hapur identitetin e tyre historik bullgar”, deklaroi Andrei Kovachev.

LEXONI GJITHASHTU:

• “Jemi maqedonas dhe në Shqipëri”, Kryeministri Mickoski mesazh nga Pusteci
• Punë apo protestë?! ‘1 Maji’ në Pustec i gjen banorët duke punuar në bujqësi