Bylykbashi: Kuvendi Kombëtar mund të shkarkojë Bashën më 11 dhjetor

E parashikon statuti që Kuvendi Kombëtar ka të drejtën të shkarkojë kryetarin e partisë. Kështu u shpreh në emisionin “Now” deputeti i PD-së Oerd Bylykbashi.

Ai tha se 4200 anëtarë të PD-së kanë përcaktuar agjendën dhe do të marrin në shqyrtim punën që ka bërë kryetari i partisë më datë 11 dhjetor, dhe “po të jetë e nevojshme do të merret masë mbi kryetarin e partisë”.

Z. Bylykbashi tha se janë thirrur dy kuvende, ai i datës 11 dhjetor, i thirrur nga anëtarët dhe ai i datës 18 dhjetor, i thirrur nga kryetari.

“Ne kemi dy kuvendi të thirrura. Një është kuvendi që thërrasin anëtarët dhe një kryetari. Mirëpo, kryetari nuk mund të pozicionohet kundër anëtarësisë, madje është kryeshërbëtori dhe duhet të ulë kokën para saj”, u shpreh z. Bylykbashi.

Deputeti i PD-së tha se një pjesë e anëtarësisë së PD-së e ka thirrur kuvendin duke parë nevojën për ndryshime statutore, pasi pretendojnë se kryetari ka marrë të gjithë pushtetin e partisë.

“Politikisht kemi një kryetar partie që pavarësisht se humbet në zgjedhje autokratizon sjelljen e tij duke menduar se partia është një garnizon ushtarak”, tha Oerd Bylykbashi për Lulzim Bashën.

LEXONI GJITHASHTU:

• Bylykbashi ‘nuk njeh’ Kryesinë e PD: Është në shkelje flagrante të Statutit