Tensione para Kryeministrisë, protestuesit çajnë kordonin e policisë

Pas përfundimit të fjalimit të kreut të PD, Sali Berisha në protestën e 12 nëntorit, pati thirrje për të ndezur qirinj për të ndjerët që Partia Demokratike akuzon se janë vrarë nga shteti.

“Kjo protestë madhështore nuk mund të mbyllet pa nderuar kujtimin e atyre që dora e pushtetit i vrau, arma e pushtetit i vrau. Ardit Gjoklaj, Klodian Rasha, Lear Kurti. Ju ftoj që në dyert e Kryeministrisë të ndezim qirinj në kujtim të jetës së tyre”.

Ishte kjo thirrja që më pas çoi një numër të lartë protestuesish në drejtim të godinës. Ata çanë kordonin e policisë për të vijuar me ndezjen e qirinjve dhe hedhjen e bojës në dyert e kryeministrisë.

Protesta ka nisur pak më pas orës 16:00, nga u lajmërua fillimisht. Pati një numër të lartë qytetarësh me pankarta në duar që kërkojnë rrëzimin e qeverisë Rama. Gjithçka shkoi e qetë deri në momentin që Berisha përfundoi fjalimin. Pas largimit të kryedemokratit filluan dhe tensionet.

Kryeministria u blindua para se të niste gjithçka, ndërsa shtyllat ndriçuese u grasuan.

Në tarracat e institucioneve përgjatë bulevardit ka efektivë gjithashtu.

LEXONI GJITHASHTU:

• Berisha valëvit flamurin kombëtar pas përfundimit të protestës
• Berisha nga protesta: Bota na sheh si njerëzit e gomoneve, fajtor është Rama