Çelet ekspozita me makina retro “Të njohim Shqipërinë”, në shërbim të turizmit

Në qytetin e Gjirokastrës u çel ekspozita e automobilave retro “Të njohim Shqipërinë”, ku 20 automjete, prodhim i viteve 1936-1955, u ekspozuan në zonën historike duke tërhequr vëmendjen e banorëve dhe turistëve. Me pjesëmarrjen e pilotëve nga Shqipëria dhe Italia, ky aktivitet promovoi turizmin përmes pasionit për historikun e automobilizmit.

“Ndodhemi në Shqipëri për një tur 10-ditor për të njohur vendin tuaj. Këtu në Gjirokastër çelëm një ekspozitë të veçantë me makinat e vjetra të markës ‘Fiat Topolino’, të cilat i përkasin periudhës nga viti 1936 deri në 1954. Personalisht disponoj një makinë të vitit 1954 dhe ishte kënaqësi e veçantë që e prezantova në këtë aktivitet”, – shprehet një turiste italiane.

“Disponoj një makinë tip ‘Fiat Topolino’ të vitit 1950. E kemi trashëgimi në familje nga babai. Kjo makinë ka qenë pjesë e jetës sime dhe ishte një kënaqësi e veçantë që e prezantova në këtë ekspozitë retro këtu në Gjirokastër. Emocion i veçantë ishte edhe vizita në këtë qytet të mrekullueshëm dhe me njerëz mikpritës”, – flet një turist italian.

“Automjetin që kam sjellë në këtë ekspozitë e kam blerë përpara 10 vitesh dhe është një ‘Fiat Topolino’ prodhim i vitit 1954. Tashmë është pjesë e familjes sime. Dëshiroj të vlerësoj edhe çeljen e kësaj ekspozite në Gjirokastër – me të vërtetë një aktivitet shumë i bukur”.

Në qytetin e Gjirokastrës vazhdimisht janë organizuar ekspozita të automjeteve retro, të cilat kanë qenë pika tërheqëse të itinerareve dhe guidave turistike.

LEXONI GJITHASHTU:

• Hapet ekspozita “Elbasani në 100 vjet”, historia e qytetit vjen përmes fotografive
• ISHP: Ekspozimi ndaj metalit të plumbit, dëme në shëndetin e fëmijëve