Çelet në muzeun ‘Marubi’ ekspozita me fotografi të pazarit të vjetër të qytetit

Në Muzeun Kombëtar të Fotografisë “Marubi” në Shkodër është hapur një ekspozitë e veçantë që sjell në fokus historinë vizuale dhe kulturore të Pazarit të Vjetër të qytetit.

Për herë të parë për publikun prezantohet koleksioni fotografik i tregtarit shkodran Palokë Laca, i cili ruhen në arkivin e Muzeut të Etnografisë në Budapest. Krahas këtij koleksioni të rrallë, ekspozita përfshin edhe objekte nga fondi etnografik i Institutit të Antropologjisë, si dhe imazhe të papublikuara më parë nga arkivi i vetë muzeut “Marubi”.

Një hapësirë e veçantë i është dedikuar dizajnerit shkodran Jozef Martini, i cili ofron një interpretim bashkëkohor të motiveve tradicionale përmes tekstileve jacquard. Puna e tij synon të bashkojë mjeshtërinë tradicionale me ndjeshmërinë estetike moderne.

“Përmes kësaj ekspozite, dëshiroj t’ju ftoj në një udhëtim që kthen pas në kohë, kujtime dhe imagjinatë. Në këtë mënyrë, secili mund të përfytyrojë përvojën e vet në zemër të Pazarit të Vjetër të Shkodrës,” shprehet një nga organizatorët.

Ekspozita do të qëndrojë e hapur për publikun deri më 13 shtator, duke ofruar një përvojë unike për studiuesit, artdashësit dhe të gjithë ata që janë të interesuar në trashëgiminë kulturore të qytetit.