Celibashi komenton sherrin te shkolla “1 Maji”, pezullohet përkohësisht numërimi i votave

Kryetari i Komisionit Qendror të Zgjedhjeve, Ilirjan Celibashi ka qenë personalisht në shkollën “1 Maji” ku pati një konfrontim fizik mes vëzhguesve dhe numëruesve në këtë KZAZ.

Ai inkurajoi strukturat e Policisë së Shtetit që të zbardhin sa më parë shkaqet e këtij sherri.

“Ajo është çështje e organeve kompetente. I pyeta, por nuk i njihnin. Më thanë se i gjithë incidentit ka ndodhur nga pjesa e vëzhgimit. Sa herë ka nevojë për të rivendosur rendin, vetëm Policia mund ata bëjë këtë”, tha ai.

Kryekomisioneri tha gjithashtu se ky sherr është rasti i parë që ndodh në KZAZ-të e Tiranës, ndërkohë u shpreh optimist për procesin e numërimit.

“Ky është rasti i parë. Nëse nuk gaboj janë mbi 65% e kutive të votimit që janë numëruar në më pak se 24 orë. Ka një  lloj reflektimi është e vërtetë, nëse do ketë qetësie përreth tyre  me siguri puna do mbaroj shpejt”, shtoi ai.

Gazetarja e Euronews Albania, Eksiola Shehu konfirmon faktin se në këtë KZAZ do të jepen autorizime të reja, me qëllim pengimin e hyrjes së personave të panjohur, që nuk kanë lidhje me procesin.

Po ashtu numëruesit e shkollës “1 Maji” kanë pezulluar për katër orë procesin e numërimit për shkak të lodhjes.