Champions League: Bayern kërkon biletën në Skoci, Feyenoord sfidon Milanin

Faza Play-Off e Champions League vijon këtë të mërkurë me katër ndeshje të tjera, ku në fushë zbresin ekipe si Bayern Munich, Milan, Monaco dhe Atalanta.

Gjermanët përballen në transfertë me Celtic, një kundërshtar i konsideruar i lehtë në letër. Bavarezët janë favoritë, duke marrë parasysh historinë e përballjeve mes tyre, ku nga katër ndeshje të zhvilluara, kanë fituar tre dhe një është mbyllur në barazim.

Në stadiumin “De Kuip”, Milani do të sfidojë Feyenoord. Kuqezinjtë, të cilët deri në javën e tetë e shihnin veten të kualifikuar direkt në fazën e 1/16-ve, humbën këtë avantazh pas disfatës ndaj Dinamo Zagreb. Tashmë ata duhet të luajnë Play-Off-in për të siguruar vazhdimin e rrugëtimit në Champions League. Me ish-yllin e Feyenoord-it në radhët e veta, Milani beson se mund ta kalojë këtë pengesë, por duhet të ketë kujdes, pasi atmosfera në Rotterdam ka qenë problematike edhe për ekipe të mëdha si Bayern Munich.

Ndërkohë, dy duelet e tjera të mbrëmjes do të jenë Monaco-Benfica dhe Club Brugge-Atalanta. Për ekipin italian të Gjimshitit, kjo do të jetë përballja e parë me belgët, ndërsa sfida mes Monacos dhe Benficës sjell një përballje mes dy skuadrave që njihen mirë, pasi janë takuar edhe më herët në këtë edicion të Champions League.

Kështu, me këto përballje mbyllet kjo javë e fazës Play-Off në kompeticionin më të rëndësishëm europian për klube.

LEXONI GJITHASHTU:

• Champions League/ PSG përmbys sheikët e Manchester City-t, turpërohet Bayern Munich
• Reali triumfon me përmbysje, Juventus ia del në Torino