Chelsea në gjysmëfinale të Kupës së Ligës, mposht Cardiffin në transfertë

Chelsea ka siguruar një vend në gjysmëfinalet e Kupës së Ligës në Angli, pas fitores në transfertë ndaj Cardiffit të martën.

Blutë e Londrës shfaqën formë të mirë edhe në këtë kompeticion, duke shënuar tre gola në pjesën e dytë.

Garnacho kaloi Chelsea-n në avantazh në minutën e 57’, por vendasit barazuan me Turnbull. Më pas, Chelsea gjeti rrugën e rrjetës edhe me Neto dhe Garnacho sërish, për të vulosur fitoren 1-3.

Në gjysmëfinale, skuadra e Enzo Maresca do të përballet me fituesin e çiftit Arsenal-Crystal Palace.

Këtë të mërkurë në fushë do të zbresin edhe Manchester City dhe Newcastle, të dyja pretendente serioze për trofeun. Të besuarit e Pep Guardiolës do të sfidojnë Brentfordin në shtëpi, ku janë favoritë të padiskutueshëm për fitore.

Ndërkohë, Newcastle, nën drejtimin e Eddie Howe, do të luajë kundër Fulhamit, një tjetër ndeshje interesante në këtë fazë. Bardhezinjtë po kalojnë një periudhë me formë të luhatshme, duke konkurruar njëkohësisht në disa kompeticione.