Cilat janë metodat e shpërqendrimit që Trump po përdor kundra zhurmës ‘Epstein’?

Superfuqitë e Presidentit Donald Trump si figurë publike kanë përfshirë gjithmonë aftësinë për të devijuar vëmendjen, për të shmangur dhe për të mohuar.

Por këto metoda të njohura të tij për të ndërruar temën kur përballet me një çështje të ndjeshme politike, nuk po funksionojnë, ndërsa administrata e tij përpiqet të qetësojë një pakënaqësi në rritje edhe nga mbështetësit e vet më të devotshëm për shkak të lidhjeve me abuzuesin seksual të dënuar Jeffrey Epstein dhe personat e lidhur me të, sipas Reuters.

Trump i është kundërvënë gazetarëve, ka pretenduar se nuk di asgjë dhe ka përhapur shpërqendrime për të shmangur pyetjet në lidhje me Epstein-in dhe dyshimet që vazhdojnë të qarkullojnë për rastin e tij, vite pas vdekjes së tij në burg në vitin 2019. Por kërkesat për transparencë vetëm sa janë shtuar.

“Për një president dhe një administratë që janë shumë të zotë në kontrollin e narrativës, kjo është një nga ato çështje që ka rezultuar më e vështirë,” tha Erin Maguire, stratege republikane dhe ish-zëdhënëse e fushatës së Trump.

Ndryshe nga krizat politike që e kanë përndjekur Trump-in gjatë mandatit të tij të parë – përfshirë dy procedura për shkarkim dhe një hetim për bashkëpunim me Rusinë kësaj here janë vetë mbështetësit e tij që po kërkojnë më shumë transparencë për rastin Epstein, jo kundërshtarët politikë, sipas Reuters.

Trump ka ushqyer bazën e tij për vite me teori konspirative, përfshirë pretendimin e rremë se Barack Obama nuk ka lindur në SHBA. Këshilltarët e tij kanë përhapur teori të tjera edhe për Epstein-in, por i kanë lënë pas dore kur hynë në detyrë – një lëvizje që nuk është pritur mirë nga baza e djathtë, e cila prej kohësh beson se qeveria po fsheh lidhjet e Epstein-it me njerëzit e pasur dhe me ndikim.

“Donald Trump ka drejtuar një lloj skeme mashtrimi të bazuar në propagandë për pjesën më të madhe të dekadës së fundit, dhe tani po i kthehet kundër,” tha Geoff Duncan, ish-zëvendës guvernator republikan i Xhorxhias dhe kritik i Trump.

Shtëpia e Bardhë ka hedhur poshtë raportimet për lidhjet e Trump-it me Epstein-in si “lajme të rreme”, megjithëse e ka pranuar se emri i tij figuron në dokumentet që lidhen me rastin.

Trump dhe Epstein kanë qenë miq për vite, përpara se të ziheshin.

“Të vetmit që nuk arrijnë të ndalen së menduari për këtë histori janë mediat dhe demokratët,” tha zëdhënësi i Shtëpisë së Bardhë, Harrison Fields, sipas Reuters.

Para se të nisej për një udhëtim në Skoci të premten, presidenti u bëri thirrje njerëzve që të përqendrohen diku tjetër: “Njerëzit duhet të përqendrohen në sa mirë po ecën vendi,” u tha ai gazetarëve, duke u ankuar se vëmendja nuk po i kushtohet të tjerëve në orbitën e Epstein-it. “Nuk flasin për ta, flasin për mua. Unë s’kam lidhje me atë njeri,” tha Trump.

Arti i Shpërqendrimit

Në javët e fundit, Trump ka përdorur një taktikë të njohur shpërqendrimi. Ai i bërtiti një gazetari që e pyeti për Epstein-in në dhomën e kabinetit të Shtëpisë së Bardhë. Në Zyrën Ovale, pretendoi se nuk po i kushtonte shumë vëmendje çështjes. Dhe me ndihmën e Tulsi Gabbard, drejtoreshës së inteligjencës kombëtare, akuzoi publikisht Barack Obamën për tradhti, në lidhje me mënyrën se si administrata e tij trajtoi informacionet për ndërhyrjen ruse në zgjedhjet e vitit 2016.

Të enjten, Trump zhvendosi vëmendjen drejt Rezervës Federale, ku pati një përplasje me presidentin e saj Jerome Powell për çështje kostosh ndërtimi dhe kërkoi ulje të normave të interesit.

Sipas strategut republikan Brad Todd, kjo ishte më efektive sesa të fokusohej te Obama në 2016, pasi votuesit tashmë kishin dhënë gjykimin e tyre duke rizgjedhur Trump-in.

“Të kthesh kokën pas me Tulsi Gabbard nuk është mënyra e duhur për t’u zhvendosur,” tha Todd.

“Nëse do isha në vendin e tij, do shkoja çdo ditë në Rezervën Federale, derisa të ulen normat e interesit,” shtoi ai.

Demokratët kanë shfrytëzuar përpjekjet e Trump për të shmangur temën, duke ndjerë një dobësi politike dhe përçarje mes republikanëve që mund ta përdorin në favor të tyre, sidomos pas humbjeve të thella që pësuan në zgjedhjet e vitit të kalua.

Një sondazh i Reuters/Ipsos këtë muaj tregoi se shumica e amerikanëve besojnë se administrata Trump po fsheh informacion për Epstein-in një mundësi për demokratët për të shtuar presionin.

Si demokratët, ashtu edhe shumë nga mbështetësit e Trump-it duan publikimin e dokumenteve qeveritare të lidhura me Epstein-in, të cilat Departamenti i Drejtësisë kishte premtuar se do t’i bënte publike, sipas Reuters.

“Dje ishte një tjetër shembull i përpjekjes së njerëzve të Trump për të hedhur gjithçka në mur vetëm për të shmangur dosjet Epstein,” tha senatori demokrat Mark Warner në një postim në platformën X të enjten, duke iu referuar akuzave të Gabbard ndaj Obamës.

Aleatët e Trump e shohin këtë qasje për të ndryshuar temën si pjesë të një strategjie gjithmonë aktive.

“Ata gjithmonë ecin me 100 kilometra në orë. Çdo departament, çdo sekretar kabineti të gjithë janë atje, duke mbuluar çdo hapësirë me lajme,” tha strategia republikane Maguire.

Trump ka kaluar edhe periudha më të vështira më parë, dhe baza e tij konservatore, pavarësisht zhgënjimit për dokumentet e Epstein-it, është në përgjithësi e kënaqur me punën e tij në imigracion dhe ekonomi. Në një sondazh të Reuters/Ipsos në korrik, 56% e republikanëve mbështesnin bastisjet e administratës për punëtorë të paligjshëm, ndërsa 24% ishin kundër dhe 20% ishin të pasigurt.

Sondazhi tregoi gjithashtu se, ndonëse Trump është përballur me dënime për krime dhe akuza të tjera penale, ai përsëri fitoi rizgjedhjen vitin e kaluar.

“Kemi qenë në të njëjtën situatë disa herë më parë dhe ai ka shpëtuar gjithmonë,” tha analisti Frank Luntz.