Cilat janë vendet që do përfitojnë ndihmë humanitare të financuar nga SHBA

Ukraina është përfshirë në listën e vendeve që do të përfitojnë ndihmë humanitare të financuar nga Shtetet e Bashkuara përmes Zyrës së Kombeve të Bashkuara për Koordinimin e Çështjeve Humanitare (OCHA).

Sipas agjencisë së OKB-së, lista përfshin gjithsej 16 vende, mes tyre Siria, Bangladeshi, Sudani i Jugut dhe Etiopia. Fondet do të mbështesin gjithashtu Fondin Qendror të Reagimit ndaj Emergjencave (CERF), i cili përdoret për ndërhyrje të shpejta në kriza humanitare.

Më herët, Nënsekretari i Përgjithshëm i OKB-së për Çështjet Humanitare, Tom Fletcher, deklaroi se SHBA-të kanë angazhuar rreth 2 miliardë dollarë ndihmë humanitare për programet globale. Sipas Reuters, kontributet humanitare të SHBA-së në OKB kanë rënë në rreth 3.3 miliardë dollarë në vitin 2025, që përbëjnë rreth 14.8% të totalit global. Në vitin 2024, kjo shumë ishte 14.1 miliardë dollarë, ndërsa në vitin 2022 kishte arritur në 17.2 miliardë dollarë.

Ndërkohë, drejtoresha e përgjithshme e Zyrës së Kombeve të Bashkuara në Gjenevë, Tatiana Valovaya, paralajmëroi në mesin e dhjetorit se buxheti i OKB-së do të ulet me 15% në vitin 2026 krahasuar me vitin 2025. Kjo pritet të çojë në një reduktim prej 18% të vendeve të punës.

OKB-ja po përballet me një deficit buxhetor për shkak të mospagesës së kontributeve nga disa vende anëtare, përfshirë SHBA-në. Si pasojë, organizata ka nisur shkurtime shpenzimesh, ngrirje të punësimeve dhe reduktim të programeve humanitare, përfshirë ndihmën për fëmijët dhe refugjatët.