Çmimet rriten, të ardhurat  jo! Shqiptarët larg blerjes së shtëpisë

Shqiptarët janë ndër më pesimistët në Europë kur bëhet fjalë për blerjen e një shtëpie. Treguesi i besimit për blerjen e banesave qëndron në rreth -82 pikë, çka do të thotë se shumica dërrmuese e familjeve nuk e konsiderojnë të mundur blerjen e një shtëpie në 12 muajt e ardhshëm.

“Shumica e shqiptarëve e kanë të pamundur të blejnë një banesë, e madje besimi në nivelet më minimale, kjo sipas të dhënave të Eurostat. Çmimet e larta dhe të ardhurat e ulëta po e bëjnë shtëpinë gjithnjë e më të paarritshme.”-shprehet Ortensa Budlla, gazetare e Euronews Albania.

Ky nivel është më i ulët se mesatarja e Bashkimit Europian dhe reflekton vështirësitë reale që hasin qytetarët. Nga ana tjetër, rreth 42% e popullsisë në Shqipëri është në rrezik varfërie ose përjashtimi social, ndërsa të ardhurat janë shumë herë më të ulëta krahasuar me vendet e BE-së.

“Pavarësisht rritjes së pagave, mundësia për të blerë banesë me kursime. Në Shqipëri janë rritur edhe kostot dhe shpenzimet për të mira dhe shërbime bazë për një familje, duke e bërë marzhin e kursimit shumë më të vogël dhe hapësirat e kufizuara për të ofruar më shumë kredi apo banesa sociale, sidomos për çiftet e reja.”-tha Erion Muça, ekspert punësimi.

Ndërkohë, edhe pse agjencitë imobiliare raportojnë për një shtim të kërkesave për blerjen e një banese, shumica prej tyre nuk arrijnë ta finalizojnë atë, pavarësisht përpjekjeve për të kursyer apo për të përfituar kredi.

“Është goxha e vështirë, të paktën kur flasim për dyvjeçarin e fundit, të finalizojnë blerjen e një apartamenti, kjo për shkak se çmimet janë rritur në mënyrë shumë më të shpejtë sesa të ardhurat. Kërkesa është shumë e lartë edhe pse nuk e finalizojnë në mënyrë të shpejtë. Nga ana tjetër kemi klientë të huaj dhe diaspora dhe e shohin Shqipërinë si një shtet me kthim investimi më të shpejtë.”-tha Valeria Dushku, agjente imobilare.

Të dhënat e Eurostat nxjerrin në pah disa faktorë, përfshirë këtu paranë jashtë sistemit, kreditë dhe normat e interesit, si dhe të ardhurat e pakta, që ndikojnë në mënyrë indirekte për të siguruar një banesë.