Çmimi i naftës, Rama takim me furnizuesit: Në Shqipëri çmimi është rritur por më i moderuar

Këtë të mërkurë Kryeministri Edi Rama në një takim me furnizuesit e naftës ka folur mbi situatën e çmimit ndikuar nga situata e Luftës në Iran. Gjatë fjalës së tij, ai tha se çmimi është rritur në mënyrë të moderuar.

“Në Shqipëri çmimi është rritur por më i moderuar.Mbetet për tu monitoruar ditë pas dite situata.Kriza në Lindjen e Mesme nuk mund të projektohet e tëra mbi supet e konsumatorëve.Nuk kemi parë të arsyeshme që të hedhim hapin dhe të kalojmë në bord. Nëse funksionon dialogu, nuk e kemi qëllimin t’ju shtrëngojmë ju në punën tuaj, por synimi është të merremi vesh. Kriza në Lindjen e Mesme nuk mund të projektohet mbi supet e konsumatorëve; më mirë marzhe fitimi më të ulëta sesa borde në kurriz të tyre.”-tha Rama.

Po ashtu Rama ka theksuar se deri më tani nuk e kanë parë të arsyeshme që të ngrenë Bordin e Transparencës deri më tani.

“Nga ana tjetër ne kemi vënë në konsultim publik ligjin për rezervën shtetërore që do duhet të shtrihet fizikisht në 100 ditë, në 3 muaj më saktë. Dhe dua t’u them që jemi në punë për të finalizuar edhe një nismë që kemi ndërmarrë për të futur në treg si distributor garant dhe shumice një faktor shtetëror, gjë që besojmë do ta bëjë më të lehtë dhe për ju të gjithë punën. Do të garantojë sasirat e nevojshme duke pasur mbështetje dhe do të lehtësojë marrëdhëniet me të tretët. Ne do të synojmë të kemi marrëdhënie të drejtpërdrejtë me kompanitë. Dua ta mbyll duke ju kërkuar të ruani këtë ekuilibër që keni ruajtur deri tani, ne nuk kemi parë të arsyeshme që të hedhim hapin dhe të kalojmë në Bord, pasi nëse dialogu funksionon nuk kemi qëllim t’ju shtrëngojmë në punën tuaj, por të merremi vesh që kriza në Lindjen e Mesme nuk mund të projektohet e tëra mbi supet e konsumatorëve. Pra më mirë marzhe më të ulëta fitimi se sa bordi në kurriz”, tha Rama.