Pas fitimit të titullit kampion me Napolin, Antonio Conte ka marrë vendimin për të qëndruar në krye të skuadrës edhe për sezonin e ardhshëm futbollistik. Fillimisht, tekniku italian kishte lënë të kuptohej se do të largohej, por pas një takimi me drejtuesit e klubit, është arritur marrëveshja për vazhdimin e bashkëpunimit.

Conte do të vijojë të drejtojë Napolin në sezonin e ri, ku përveç kampionatit dhe Kupës së Italisë, skuadra do të marrë pjesë edhe në Ligën e Kampionëve.

Ndërkohë, Juventus, që më herët ishte përfolur si një destinacion i mundshëm për Conten, ka hequr dorë nga negociatat me trajnerin dhe po orienton vëmendjen drejt një tjetër kandidati: Simone Inzaghi.

Rinovimi i Contes është një sinjal force për Napolin, që synon të ndërtojë një epokë të re suksesi në futbollin italian dhe europian.