Çoroditen rekordet e klimës, shkencëtarët: Toka në një territor të paeksploruar

Një seri të dhënash klimatike mbi temperaturën, nxehtësinë e oqeanit dhe akullin e detit Antarktik kanë alarmuar shkencëtarët, të cilët thonë se shpejtësia dhe koha e ndryshimit të tyre është e paprecedentë. Sipas OKB-së, valët e rrezikshme të të nxehtit në Evropë mund të thyejnë rekorde të tjera.

Është e vështirë që këto ngjarje të lidhen menjëherë me ndryshimin e klimës, sepse moti dhe oqeanet janë kaq komplekse. Edhe pse studimet mbi to janë duke u zhvilluar, shkencëtarët tashmë i frikësohen situatës duke shpalosur disa skenarë të rasteve më të këqija.

“Unë nuk kam parë më parë një periudhë të ngjashme ku të gjitha pjesët e sistemit klimatik ishin duke thyer rekorde, ose ndodheshin në territore anormale”, thotë Thomas Smith, një gjeograf mjedisor në Kolegjin Ekonomik të Londrës.

“Aktualisht Toka është në një territor të paeksploruar” për shkak të ngrohjes globale si pasojë e djegies së lëndëve fosile dhe nxehtësisë që vjen nga El Niño, një sistem natyror i ngrohjes së motit që nga viti 2018”, thotë pedagogu i shkencave klimatike të Kolegjit Imperial në Londër, Dr Paulo Ceppi.

Deri në këtë periudhë të verës janë regjistruar katër rekorde klimatike të thyera; dita më e nxehtë, qershori më i nxehtë në rang global, valët ekstreme të të nxehtit detar, niveli i ulët i akullit të detit Antarktik.