Ç’po ndodh në Fier? Shtohen pickimet nga merimangat e gjarpërinjtë, apeli i mjekut

Rritja e temperaturave shton prezencën e insekteve dhe gjarprinjve që përbëjnë rrezik kryesisht për fermerët dhe punëtorët e bujqësise në qarkun e Fierit. Numri i tyre shtohet në stinën e nxehtë ndërkohë që pickimet nga merimangat apo gjarpërinjte, paraqesin rrezik për paraliza të pjesshme, alergji, apo edhe për vetë jetën.

Merimanga e njohur si “Vejusha e Zeze”, nepërka dhe shumëkëmbëshi janë disa nga gjallesat ndaj të cilave duhet bërë kujdes. Fermerët pranojnë se rreziku është prezent dhe se rastet e pickimeve nuk mungojnë, ndërsa mungesa e spërkatjeve dhe shtimi i tokave djerrë ka bërë që numri i merimangave dhe gjarpërinjve të shtohet.

“Punoj me frikë sidomos kur marr barin e thatë. Ka patur raste me këto merimangat. Problem janë edhe ferrat, ka shume aty, se shumohen”, tha një fermer për kamerën e Euroneës Albania.

Ndërkohë që një tjetër u shpreh: “Ne punojmë nepër ara dhe ka shumë merimanga. Ato që quhen Vejusha e Zezë, raste ka patur po ne e dimë ku rrinë zakonisht dhe ruhemi. Sa vijnë e shtohen më shumë do spërkatje”.

Sipas mjekut toksikolog Lulzim Banushaj punonjësit në bujqësi duhet të tregojnë kujdes të shtuar në këtë periudhë.

“Pasojat janë shendetësore, sociale dhe ekonomike. Shëndetësore se është rrezik shendeti, sidomos për ata që vuajnë edhe nga semundje të tjera. Sociale, se familja mundohet në kurimet e pacientit dhe ekonomike se pacienti do lërë punën dhe aktivitetin ekonomik. Te gjitha këto na thonë se duhen përdorur masat mbrojtëse”, tha Banushaj.

Vetëm në javën e fundit në Spitalin Rajonal të Fierit janë paraqitur 8 raste pickimesh nga insekte dhe gjarpërinj, ku njëri prej tyre në gjendje të rëndë.