Ç’po ndodh pas arrestimit të Veliaj: Rama anulon takimet, PS mbledhje urgjente grupi

Kryeministri Edi Rama ka anuluar takimet e planifikuara në Shkodër dhe është nisur urgjentisht drejt Tiranës pas masës së sigurisë “arrest me burg” të dhënë nga GJKKO për kryebashkiakun Erion Veliaj, me urdhër të SPAK.

Rama kishte planifikuar një drekë me zyrtarë dhe kryetarë bashkish të Partisë Socialiste, si dhe një takim me strukturat e PS-së në Shkodër, takime që u anuluan për shkak të zhvillimeve të fundit. Kryeministri është aktualisht në zyrën e tij.

Ndërkohë, një mbledhje e grupit parlamentar të PS është planifikuar pasditen e kësaj të hëne në Kryesinë e Kuvendit. Nuk dihet ende nëse pjesë e mbledhjes do të jetë dhe kryesocialisti Rama.

Kryebashkiaku i Tiranës, Erion Veliaj, u arrestua në zyrën e tij nga agjentët e BKH pas masës së sigurisë të lëshuar nga gjykata.

Burime jozyrtare për Euronews Albania bëjnë me dije se një masë sigurie “Arrest në shtëpi” është caktuar edhe për bashkëshorten e Veliajt, Ajola Xoxa.

Veliaj akuzohet për veprat penale: “Korrupsion aktiv i funksionarëve të lartë shtetërorë ose të zgjedhurve vendorë”, “Pastrimi i produkteve të veprës penale ose veprimtarisë kriminale”, dhe “Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim”.

LEXONI GJITHASHTU:

• Arrestohet me kërkesë të SPAK kryetari i Bashkisë së Tiranës, Erion Veliaj
• Arrestohet Erion Veliaj, momenti kur shoqërohet nga agjentët e BKH