‘Çunat e Londrës, premtim i mbajtur?’ Bushati: Qesharake, pamë kuksianë që flisnin vlonjatçe

Analistët Andi Bushati dhe Baton Haxhiu diskutuan në studion e emisionit ‘Shock’ lidhur me fluturimin e parë në aeroportin e Kukësit dhe faktin nëse mund të quhet ky një premtim i mbajtur i kryeministrit Rama.

Për analistin Andi Bushati, ceremonia e djeshme ishte qesharake. Sipas tij, Rama ka premtuar deri më tani 4 aeroporte dhe deri tani nuk ka mbaruar asnjë, pasi aeroporti i Kukësit nuk është funksional dhe nuk njihet ndërkombëtarisht.

“Është qesharake. Pamë kuksianë që flisnin vlonjatçe dhe kjo kompania e Erdoganit po kthehet në kompani elektorale.

Më kujtohet një thënie e Ramës në 2013, ku Berisha premtonte aeroporte; nuk ka gënjeshtar më të mëdhenj se ata që premtojnë aeroporte. Ka premtuar 4 dhe s’ka bërë asnjë, në këtë aeroport nuk zbret dot avionë. Nga Londra nuk merrte do leje avioni që të ulej në Kukës se nuk e njeh kush ndërkombëtarisht”, tha Bushati.

Sipas analistit Baton Haxhiu, lkjo është një arritje që i duhet njohur kryeministrit Edi Rama, pasi aeroporti i Kukësit, edhe pse nuk është ende i njohur ndërkombëtarisht është një aeroport shumë i bukur, madje me i mirë si ai i Rinasit.