Dakordësia me Rithemelimin, reagon Rama: Pazar me “non-gratën”? Shpifje!

Kryeministri Edi Rama ka reaguar për herë të parë në lidhje me dakordësinë e arritur mes maxhorancës dhe deputetëve të Rithemelimit për ngritjen e komisioneve hetimore dhe rikthimin e jetës paralamentare në normalitet.

Përmes një reagimi në rrjete sociale, shefi i qeverisë hedh poshtë aludimet që e kanë cilësuar dakordësinë si një pazar dhe bashkëpunim me “non gratën”.

Rama thekson se ngritja e komisioneve hetimore, nuk mund të refuzohet nga qeveria nëse bëhet brenda kornizës ligjore.

Duke u ndalur tek Komisioni bipartizan i Reformës Zgjedhore, Rama tha se nëse dështon përpara afatit dhe nëse PS nuk ka votat për ndryshimet në Kodin Zgjedhor, do të shkohet në zgjedhje me ligjin që është aktualisht.

“Të gjithë idiotët e dobishëm janë sulur socialeve e kanaleve për të thënë se paskërkemi gëlltitur ç’kemi thënë dhe po bashkëpunokemi me Non Gratën, pse jemi dakord që sipas kornizës së përcaktuar nga Gjykata Kushtetuese të miratojmë komisione hetimore brenda kësaj kornize!

Po ne këtë e kemi thënë e stërthënë dhjetra herë, qyshse refuzuam të miratojmë kërkesa për të ngritur komisione hetimore jashtë asaj kornize! Dhe nëse deputetë të Kuvendit që mbledhin firmat për të ngritur një komision hetimor e bëjnë kërkesën brenda asaj kornize, ne s’kemi as të drejtë, as arsye e as mundësi që ta refuzojmë. E kurdoherë që kjo të ndodhë vota jonë është sigurisht pro!

Çfarë ka këtu për të vënë kujën përveç nevojës për të helmuar publikun me akuza dhe shpifje krejt të pabaza mbi medemek “pazarin me Non Gratën”, i cili thjesht nuk ekziston?

Edhe për Komisionin bipartizan të Reformës Zgjedhore e kemi thënë prej disa kohësh, nëse nuk pjell asgjë veç sherrit e shamatasë së tyre deri kur të mbyllet afati, do të mbyllet edhe komisioni e kjo punë do t’i mbetet Kuvendit, ku po nuk u arrit dot ndonjë mirëkuptim për ndryshime të ligjit dhe s’ka numra në sallë për të votuar ndryshime, do të shkojmë në zgjedhje me ligjin që kemi. As për këtë s’kemi ndryshuar ndonjë qëndrim a mendim.

Atëherë ku është ky pazar dhe ku hyn Non Grata në këtë mes?!

Ah, nëse ata që do të digjnin parlamentin kanë ndërruar mendje dhe duan të rikthehen në punë, ne as nuk i pengojmë dot, as nuk duam t’i pengojmë të reflektojnë, përkundrazi na vjen mirë që ta bëjnë. Kjo është e gjitha dhe ne jemi ata që ishim, aty ku ishim, me po ato qëndrime që kishim, jo sepse është gabim të ndryshosh qëndrim, po sepse në këtë nuk ka asgjë për të ndryshuar në qëndrimin tonë.

Çudi që s’e mësuan dot që Partia Socialiste është gjithnjë tre hapa përpara dhe në fund të gjitha xhirot bosh përfundojnë po në pikën ku nisin, tre hapa mbrapa nesh”, shkruan Rama.

LEXONI GJITHASHTU:

• Dakordësia PS-Rithemelimi, ambasadori gjerman: Shpresojmë zhvillime për Zgjedhoren
• Salianji godet marrëveshjen PS-Rithemelimi: Kundër interesave të demokratëve