Danimarka blen avionë patrullimi nga SHBA pavarësisht tensioneve mes tyre për Groenlandën

SHBA ka njoftuar se të hënën ka miratuar shitjen e avionëve të patrullimit bregdetar dhe zbulues forcave të armatosura daneze për 1.8 miliardë dollarë, pavarësisht përshkallëzimit të tensioneve mbi Groenlandën.

Departamenti Amerikan i Shtetit njoftoi se ka miratuar një kërkesë nga Danimarka për të blerë sistemin e patrullimit dhe zbulimit P-8A nga Boeing, i cili do të përfshijë deri në tre avionë.

“Shitja e tre P-8 Poseidon do të mbështesë politikën e jashtme të SHBA-së dhe objektivat e sigurisë kombëtare duke përmirësuar sigurinë e një aleati të NATO-s që është një forcë për stabilitet politik dhe përparim ekonomik në Evropë”, tha Departamenti i Shtetit.

Një javë më parë, administrata Trump miratoi shitjen e raketave të prodhuara në Amerikë në Danimarkë me vlerë 1 miliard dollarë.

Shtetet e Bashkuara po ushtrojnë presion mbi aleatët e NATO-s që të shpenzojnë më shumë për mbrojtjen, ndërsa Trump ka thënë vazhdimisht se Uashingtoni ka nevojë për Groenlandën për sigurinë e SHBA-së,

Ai gjithashtu ka shprehur vazhdimisht qëllimin e tij për ta bërë Groenlandën pjesë të SHBA-së.