DASH shpall organizata terroriste katër grupe antifashiste evropiane

Qeveria amerikane ka përcaktuar katër grupe antifashiste evropiane si organizata terroriste, në kuadër të ofensivës së presidentit Trump ndaj së majtës ekstreme, pas vrasjes së aktivistit konservator Charlie Kirk.

Sekretari i Shtetit, Marco Rubio deklaroi të enjten se Uashingtoni do të etiketojë si të tilla grupin gjerman Antifa Ost, atë italian Fronti Revolucionar dhe dy grupe të tjera në Greqi, Drejtësia Proletare e Armatosur dhe Klasa Revolucionare e Vetëmbrojtjes.

“Grupe të rreshtuara pranë këtyre lëvizjeve favorizojnë ideologjitë anarkiste ose marksiste, përfshirë anti-amerikanizmin, anti-kapitalizmin dhe anti-krishtërimin, duke i përdorur ato për të justifikuar sulme si brenda edhe jashtë shteteve përkatëse”, deklaroi Rubio.

Ai nënvizoi se Shtetet e Bashkuara do të vazhdojnë të përdorin të gjitha mjetet për të mbrojtur sigurinë kombëtare dhe atë publike dhe do të pengojë rrugët e financimit të terroristëve, duke vënë në shënjestër grupe të tjera antifashiste në mbarë globin.

Grupet në fjalë akuzohen se “komplotojnë për të minuar themelet e qytetërimit perëndimor, përmes sulmeve brutale”, thuhet në një komunikatë të Departamentit të Shtetit.

Antifa është shkurtimi i termit “antifashist”, një kornizë që përfshin aktivistë apo grupe të spektrit politik të së majtës ekstreme.

LEXONI GJITHASHTU:

• Rusia nuk ka plane për të sulmuar NATO-n, por është përgatitur për…
• Maduro thirrje Trump: Mjaft me luftëra, të bashkohemi për paqen e Amerikës