Konferenca e Sigurisë së Mynihut e këtij viti ishte e fokusuar kryesisht në dy çështje kyçe: përfundimi i luftës në Ukrainë pa kompromentuar sovranitetin e saj dhe rritja e shpenzimeve për mbrojtjen në Evropë. Megjithatë, nënpresidenti i Shteteve të Bashkuara, JD Vance, surprizoi të pranishmit duke shmangur të dyja temat dhe duke kritikuar ashpër aleatët e Uashingtonit.

Gjatë fjalimit të tij 20-minutësh, Vance sulmoi qeveritë evropiane, përfshirë Britaninë, duke i akuzuar për largim nga vlerat e tyre themelore dhe injorim të shqetësimeve të votuesve mbi migracionin dhe lirinë e fjalës. Deklaratat e tij u pritën me heshtje nga delegatët, duke e bërë një nga momentet më të sikletshme të konferencës.

Megjithëse fjalimi u perceptua negativisht, analistët vlerësojnë se ai iu drejtua kryesisht publikut të brendshëm amerikan. Pas fjalimit, Vance zhvilloi një takim me presidentin e Ukrainës, Volodymyr Zelensky, i cili e vlerësoi takimin si “një fillim të mirë” për bashkëpunimin e ardhshëm mes Uashingtonit dhe Kievit.

Fjalimi i Vance erdhi në një moment kritik për Ukrainën, pasi administrata e Presidentit Donald Trump ka sinjalizuar një qasje më pragmatike në konflikt. Sipas Sekretarit të Mbrojtjes, Pete Hegseth, kthimi i territorit ukrainas në kufijtë e vitit 2014 është “jo realist”. Po ashtu, SHBA ka përjashtuar mundësinë e anëtarësimit të Ukrainës në NATO dhe ka refuzuar dërgesën e trupave amerikane në territorin ukrainas.

Samiti i Mynihut vjen në sfondin e një telefonate 90-minutëshe mes Trump dhe presidentit rus, Vladimir Putin, e cila ka rindezur shqetësimet për qasjen e ardhshme të SHBA ndaj Moskës. Ndërkohë, liderët evropianë në Mynih shprehin frikën se një pakt i shpejtë për paqen në Ukrainë mund të rezultojë në një fitore për Putinin dhe një rritje të agresionit rus ndaj Evropës.

Debati mbi Ukrainën do të vazhdojë këtë të shtunë, kur delegatët do të diskutojnë opsionet për ndalimin e agresionit rus dhe forcimin e sigurisë evropiane.

LEXONI GJITHASHTU:

• “Ka ardhur sherif i ri në qytet”- Vance shokon liderët evropianë në Mynihh
• Von der Leyen paralajmron Trump: Dështimi në Ukrainë dobëson BE-në dhe SHBA-të
• “Jeni tërbuar” Medvedev sulmon Evropën pas bisedës Trump-Putin: Koha juaj ka mbaruar