Debati për integrimin evropian, Tabaku akuza Xhaçkës: Qeveri pasive

Për 4 orë parlamenti zhvilloi një mocion debati të kërkuar nga opozita për çështjen e integrimit evropian. Për deputeten Jorida Tabaku, qeveria nuk po bën hapa konkretë në rrugën drejt familjes europiane.

“Për mua nuk është aspak e habitshme që kjo qeveri është pasive në raport me procesin e integrimit, duke e kthyer atë në një proces teknik pa asnjë thelb e pa asnjë qëllim politik siç ka ndodhur deri më sot. E kam lexuar qartë në çdo nismë të qeverisë që bie në kundërshti me parimet mbi mjedisin, mbi tregun, mbi studimin e ligjit, mbi demokracinë mbi zgjedhjet, mbi drejtësinë. Çdo nismë madhore e qeverisë ka prodhuar debat jo për natyrën proaktive në procesin e integrimit por ka prodhuar debat për natyrën regresive. Koha e viktimizimit duhet të marrë fund”, u shpreh Jorida Tabaku.

Ndërsa për ministren e jashtme Olta Xhacka, raporti i komisionit europian për Shqipërinë është një plan pune për qeverinë.

“Unë nuk e shoh aspak raportin si një fletë lavdërimi. Ky raport është mbi të gjitha një dokument pune. Dhe ju  garantoj, që rekomandimet e Komisionit Evropian nuk janë thjesht më një orientim, dhe po kthehen në një plan pune për qeverinë”, tha Xhaçka.

Integrimi europian shkaktoi debate dhe përplasje në fillim të seancës. Shkak u bë shpërndarja e kohës për deputetët që do të merrnin fjalën. Deputetët mbështetës të Sali Berishës kërkuan më shumë kohë në dispozicion.

LEXONI GJITHASHTU:

• Gazment Bardhi përjashtohet për 5 ditë nga Kuvendi dhe Komisionet Parlamentare
• “E kuptoj mungesën e guximit”, Alibeaj kërkon përjashtimin e Ramës nga Kuvendi
• Braçe kundër vendimit: E paligjshme vendosja e traut në Parkun e Divjakës