DEKRETI/ Vjosa Osmani shpërndan Kuvendin e Kosovës

Presidentja e Kosovës, Vjosa Osmani, ka shpërndarë Legjislaturën e nëntë të Republikës së Kosovës, pas dështimit të krijimit të Qeverisë edhe nga mandatari i dytë, Glauk Konjufca.

Lajmi është konfirmuar nga faqja zyrtare e Presidencës së Republikës së Kosovës, e cila ka publikuar dhe dekretin presidencial ndërsa njofton se:

“Në përputhje me Kushtetutën e Republikës së Kosovës dhe legjislacionin në fuqi, si dhe pas pranimit sot të vendimit të Kuvendit të Kosovës lidhur me dështimin e krijimit të Qeverisë edhe nga mandatari i dytë, Presidentja e Republikës së Kosovës ka shpërndarë sot Legjislaturën e nëntë të Republikës së Kosovës.”

Shpërndarja e kuvendit u konfirmua më parë edhe nga kreu i Aleancës për Ardhmërinë e Kosovës, Ramush Haradinaj.

“Sot është nënshkruar dekreti për shpërndarjen e Kuvendit të Kosovës”, tha mes tjerash ai.

Partitë politike kanë mbetur të ndara për caktimin e datës së zgjedhjeve të parakohshme, duke mos arritur një konsensus.

Disa forca politike preferojnë që zgjedhjet të mbahen më 21 dhjetor, ndërsa të tjera e favorizojnë datën 28 dhjetor.

Tani, vendimi përfundimtar për datën e zgjedhjeve mbetet në dorë të Presidentes Osmani, e cila do të shpallë zyrtarisht datën e procesit zgjedhor.

LEXONI GJITHASHTU:

• Dështon formimi i qeverisë, Osmani nis konsultimet për zgjedhjet e parakohshme
• Dështon seanca e zgjedhjes së Kryeministrit në Kosovë, Konjufca nuk merr votat