Dëmet e tërmetit, qeveria u kalon fondin bashkive Kavajë dhe Kamëz

Këshilli i Ministrave ka miratuar sot fondin për riparimin e dëmeve për banesat dhe pallatet në zonën e Kamzës dhe Kavajës.

Në total bëhet fjalë për një fond prej 510 milionë lekë të reja që do t’u ofrohet familjare që u janë dëmtuar banesat nga tërmeti i 26 nëntorit të vitit të kaluar.

Këto fonde t’u kalojnë Bashkive Kavajë dhe Kamëz që më pas do të bëjnë shpërndarjen në bazë të dëmeve, ku nga kjo fazë përfitojnë ata me vlerësim dëmi D1, D2 dhe D3.

“Bashkisë Kamzë i transferohet fondi prej 163 890 000 (njëqind e gjashtëdhjetë e tre milionë e tetëqind e nëntëdhjetë mijë) lekësh, në formën e transfertës së pakushtëzuar;Bashkisë Kavajë i transferohet fondi prej 346 350 000 (treqind e dyzet e gjashtë milionë e treqind e pesëdhjetë mijë) lekësh, në formën e transfertës së pakushtëzuar”, thuhet në vendimin e qeverisë.

Bashkia e Shijakut është bërë bashkia e parë nga ato që janë prekur nga tërmeti, që ka nisur shpërndarjen e fondeve për riparimin e banesave.

Tërmeti i 26 nëntorit 2019, përveç dëmeve të shumta materiale duke lënë qindra familje pa banesa dhe mijëra të tjerë me shtëpi të dëmtuara, shkaktoi dhe 51 humbje jete.

Lexoni gjithashtu:

Dëmshpërblim, Ahmetaj: Qytetarët e Shijakut që nga e premtja marrin pagesat për riparimin e shtëpive