Dëmet nga tërmeti i 26 nëntorit, asnjë monument kulturor i restauruar

Po bëhen gati 2 vite nga tërmeti i 26 nëntorit 2019 dhe puna për të restauruar dëmet e monumenteve të kulturës nuk ka përfunduar.

Bashkimi Evropian dhuroi 40 milionë euro për restaurimin dhe mbrojtjen e trashëgimisë kulturore, ndërsa ambasada amerikane dha 800 mijë dollarë.

Këto para, sipas njoftimit të Ministrisë së Kulturës do të shkonin për rijetësimin e Torrës Veneriane në Durrës, Muzeut Etnografik në Krujë, Muzeut Etnografik në Kavajë, Teatrit të Kukullave, Urës së Kurçajt e monumenteve të tjera kulturore.

Nga një vëzhgim që ka bërë Euronews Albania, në kullën e sahatit në Krujë, në Teqenë e Dollmës, në Kalanë e Durrësit dhe atë të Prezës, punimet kanë nisur, por deri më tani në asnjë prej tyre puna nuk ka përfunduar.

Lista e monumenteve të kulturës që kanë pësuar dëmtime është e gjatë, e ndarë në tre shkallë, sipas gradës së dëmtimit.

26 monumente kanë pësuar dëmtime të rënda dhe 32 dëmtim mesatar.  

Ndërsa tek lista e monumenteve me risk të lartë, nuk ka nisur puna në kulla e Sulejman Kullës, apo në murin e kalasë në Porto Romano, apo në shtëpinë e Kolë Idromonesë, që edhe pse ne Shkodër, është listuar tek monumentet e dëmtuara nga tërmeti i nëntorit.

Numri i atyre që kanë pësuar dëmtime më të lehta është më i madh. Në këto objekte nuk ka nisur restaurimi dhe koha e faktorët e jashtëm janë një kërcënim i vazhdueshëm për dëmtimin më serioz të tyre.

LEXONI GJITHASHTU:

• Mbrojtja e trashëgimisë kulturore, Shqipëria e ftuar në Itali për restaurimin e objekteve historike