Dëmtohet ujësjellësi, zgjidhje provizore për furnizimin me ujë në Vlorë

Qyteti i Vlorës është përballur këtë të premte me probleme me furnizimin me ujë. Problemet janë shfaqur për shkak të një dëmtimi në tubacionin me diametër 1000 mm.

Gjatë pasdites është realizuar një zgjidhje provizore për furnizimin me ujë të qytetit, e cila nuk është përfundimtare. Për shkak të defektit të rëndë, ndërhyrja do të vijojë sërish në orët e mëngjesit, me qëllim riparimin e plotë të tubacionit dhe rikthimin e furnizimit normal me ujë për qytetin.
Kreu i Ujësjellësit të Vlorës, Ermal Murati e ka cilësuar dëmtimin serioz dhe se presioni i ujit ka qenë i lartë. Kjo sipas tij i ka detyruar të ndërpresin furnizimin.

“Avaria është vërtet serioze. Për çështje sigurie jemi detyruar të ndërpresin furnizimin me ujë pasi presioni është shumë i lartë. Siç tha edhe nga drejtori, nesër do të kemi një ndërhyrje më të plotë të situatës për t’i dhënë një herë e mirë një zgjidhje këtij problemi që është në tubacionin 1000 që ndodh radhe dhe kërkon angazhim maksimal nga ne”, tha Murati.