Denis Dyrnjaja: Qeveria është Rama, ministrat janë aty thjesht për të marrë ca portofole

Gazetari Denis Dyrnjaja shprehu rezerva për kabinetin e ri qeveritar “Rama 3”, ndërsa e sheh të palogjikshme shkrirjen e Ministrisë së Diasporës.

“U shkri Ministria e Diasporës. U bënë samite, me angazhime, me jehonë mediatike dhe në fund u shpërbe gjithçka”, tha ai në “Now” në Euronews Albania.

Ai theksoi se qeveria është kot, pasi Rama është ai që merr çdo vendim. Sipas tij, ministrat janë aty për të marrë thjesht përfitimet politike.

“Unë mendoj se qeveria është kot, në një kuptim qeveria është Rama-kryeministër, Rama-ministër.  Ministrat janë aty thjesht për të marrë ca portofole dhe për të marrë CV politike dhe administrative, dhe nuk janë aty për të qenë ministra”, tha ai.

Një tjetër shqetësim për Dyrnjanë është fakti se ministrat nuk kanë pasur rezultate, por më shumë janë përfolur për probleme.

“Po të marrësh rezultatet e ministrave, ne nuk kemi ministra që lënë gjurmë të mëdha që të thuash. Më shumë i përflasin ministrat për probleme se për arritje”, shtoi ai.

Gjithashtu ai e quan të palogjikshme përzgjedhjen e Ramës, që Shqipëria të ketë katër ministra shteti.

“Për çfarë duhen katër ministra shteti? Duket fiks si poste qokë, pikat më kruciale në qeveri i kemi të dyshimta. Rama ka tre persona të rëndësishëm: Arben Ahmetajn, Damian Gjiknurin dhe Taulant Balla. Këta janë edhe qeveria, edhe partia edhe gjithçka tjetër që ka Rama”, shtoi ai.