Dënohet me 2 vjet burg Safet Gjici, 1 vit burg për prostitucion Alma Kaçit

GJKKO ka dënuar me 2 vjet burg për shpërdorim detyre ish-kryebashkiakun e Kukësit Safet Gjici, ndërsa ka dhënë 1 vit burg për Alma Kaçin me akuzën e prostitucionit.

Gjykata ndryshoi akuzën për Gjicin nga korrupsioni pasiv në shpërdorim detyre dhe për Kaçin nga korrupsion aktiv në prostitucion.

“Vuajtja e dënimit për të pandehurin Safet Gjici fillon nga dita e ndalimit më datë 24.06.2023 dhe referuar ligjit nr.81/2020 “Për të drejtat dhe trajtimin e të dënuarve me burgim dhe të paraburgosurve”, duhet të kryhet në një institucion të sigurisë së zakonshme.Në aplikim të nenit 35 të Kodit Penal, të pandehurit Safet Gjici i hiqet e drejta për të ushtruar funksione publike për një periudhë prej 5 (pesë) vjetësh”, thuhet në vendimin e GJKKO.

Sipas Prokurorisë Speciale SPAK, Safet Gjici ka përfituar favore seksuale nga Kaci, duke i premtuar kësaj të fundit një projekt për qentë, ndërsa kjo e fundit ja ka ofruar favoret, përderisa kryen marrëdhënie seksuale në zyrën e punës së kryebashkiakut.

Para shpalljes së vendimit, ish-kryebashkiaku kërkoi pafajësi gjatë konkluzioneve të mbrojtjes duke pretenduar se nuk ka shkelur asnjë ligj, ndërsa i kërkoi falje familjes.

“Unë kam marrë dënimin më të madh, dënimin moral. U kërkoj falje familjarëve të mi dhe qytetarëve të Kukësit”, tha Gjici.

Safet Gjici u arrestua më 24 qershor pas video-skandalit ku ai shihet teksa kryen marrëdhënie intime me Alma Kaçin. Pas aktit seksual Kaçi i ka kërkuar ish-kryebashkiakut favore në lidhje  me një tender për ngritjen e një strehimi për qentë.

LEXONI GJITHASHTU:

• Shtyhet seanca për Safet Gjicin, shkak mungesa e një anëtari të trupit gjykues
• Nuk i dhashë lejen e ndërtimit- Gjici flet në gjykatë: Kush e pagoi Alma Kaçin