Deputeti australian Gareth Ward shpallet fajtor për përdhunim

Një politikan i Uellsit të Ri Jugor, NSW në Australi është shpallur fajtor për sulm seksual ndaj dy të rinjve.

Juria shpalli Gareth Ward ende anëtar aktiv i parlamentit shtetëror fajtor për tre akuza për sulm të pahijshëm dhe një për përdhunim.

Sipas dëshmive, viktimat të moshës 18 dhe 24 vjeç janë sulmuar në banesën e Ward, pasi ishin njohur me të në rrethana politike midis viteve 2013 dhe 2015.

Ward dha dorëheqjen si ministër shtetëror dhe u largua nga Partia Liberale në vitin 2021, kur u bënë publike akuzat, por refuzoi të largohej nga parlamenti dhe u rizgjodh si përfaqësues i zonës Kiama në vitin 2023.

Juria u tërhoq për vendim pas tre ditësh diskutimesh, në përfundim të një procesi që zgjati nëntë javë në Gjykatën e Distriktit të NSW.

Gjatë gjyqit u dëgjua se në vitin 2013, Ward kishte ftuar një 18-vjeçar të dehur në banesën e tij dhe e kishte sulmuar seksualisht tre herë, pavarësisht rezistencës së tij. Dy vite më pas, ai përdhunoi një punonjës të parlamentit pas një aktiviteti zyrtar.

Ward mohoi kategorikisht ngjarjen e vitit 2015 dhe deklaroi se viktima tjetër kishte keqkuptuar situatën nga viti 2013.

Por prokurorja Monika Knowles theksoi para jurisë se ngjashmëritë e habitshme mes rrëfimeve të dy viktimave të cilët nuk njiheshin mes tyre – dëshmonin besueshmërinë e deklarimeve të tyre.

“Sjellje e ngjashme, vend i ngjashëm, i njëjti njeri, e njëjta përfundim. Nuk është rastësi,” u shpreh Knowles, sipas mediave vendase.

Ward pritet të rikthehet në gjykatë më vonë gjatë vitit për shpalljen e dënimit.

Qeveria e NSW kishte shqyrtuar mundësinë e votimit për përjashtimin e tij nga parlamenti ku është pjesë që prej vitit 2011 por këshillat ligjore paralajmëruan se kjo mund të ndikonte në zhvillimin e gjyqit.