Deputeti socialist: Nesër nuk kemi antimiting, por festën e 35-vjetorit të PS-së

Deputeti i Partisë Socialiste, Erion Malaj, deklaroi se aktiviteti që do të zhvillohet në Tiranë me rastin e 35-vjetorit të themelimit të Partisë Socialiste nuk është organizuar si kundërpërgjigje ndaj protestës së opozitës. I ftuar në emisionin “Now me Erla Mëhillin”, Malaj tha se data e aktivitetit është përcaktuar shumë kohë përpara nisjes së protestave.

Sipas tij, drejtuesit politikë të PS-së e kanë vendosur që mbyllja e festimeve për 35-vjetorin të zhvillohet më 12 qershor, në një mbledhje të mbajtur rreth një muaj e gjysmë më parë. Deputeti socialist theksoi se kjo datë përkon pikërisht me ditën e themelimit të Partisë Socialiste të Shqipërisë, ndaj zgjedhja e saj nuk lidhet me zhvillimet e fundit politike.

Malaj nënvizoi se aktiviteti i PS-së është një festë e planifikuar më herët dhe jo një “antimiting”.

“Tani po ju jap një përgjigje të drejtpërdrejtë. Duke qenë se data 12 qershor është ekzaktësisht data e themelimit të Partisë Socialiste dhe që mbyllja e të gjithë festimeve të 35-vjetorit do të bëhej më 12 qershor, ne e kemi caktuar këtë me të gjithë drejtuesit politikë në një mbledhje, në mos gaboj, para një muaji e gjysmë. Ne nesër nuk kemi një antimiting, por kemi një festë që e kemi planifikuar para një muaji e gjysmë. Datën 12 qershor e kemi caktuar shumë kohë më parë dhe kjo përkon me datën e themelimit të Partisë Socialiste. Nuk bëjmë antimiting. I kemi lënë të gjithë qytetarët në të drejtën e tyre për të protestuar”, tha Malaj.