Deputeti ukrainas, Goncharenko: Rusia po përparon, por nuk po fiton

Në një lidhje live për Euronews Albania në emisionin Balkan Talks me Franko Egro ishte i ftuar politikani ukrainas, deputet i parlamentit dhe anëtari i delegacionit ukrainas në Asamblenë Parlamentare të Këshillit të Evropës, Oleksej Goncharenko.

Goncharenko foli mbi zhvillimin e luftës Ukrainë-Rusi e cila po hyn në vitin e katërt, ku sipas tij Rusia ka fituar terren, por jo aq sa për t’u konsideruar sukses.

“Ata thanë më herët se do kishin marrë lindjen e Ukrainës, por dështuan, ndaj ata po sulmojnë, luftojnë qytetin e Prokovskut ku kanë mbetur vetëm pak qindra njerëz që jetojnë nën rrënoja. Është e vërtetë që ata kanë fituar terren, por është një fitore e kufizuar dhe me një çmim të rëndë”, është shprehur Goncharenko.

I pyetur nga gazetari sesi do ta përshkruante moralin e ushtrisë ukrainase në këto momente pas afro katër vitesh luftë dhe rezistence heroike, ai u shpre:

“Nuk janë katër vjet, janë 12 vjet. Katër vjet Rusia nisi pushtimin tokësor. Ukrainasit janë të lodhur por në të njëjtën kohë ne e dimë pse po luftojmë, ne e dimë që Rusia po ushtron gjenocid ndaj ukrainasve. Ne po mbrojmë të ardhmen tonë, vendin tonë dhe shpresat tona, ne nuk do të dorëzohemi. Duam paqe që uroj të vijë sa më parë, të jetë një paqe afatgjatë dhe e qëndrueshme dhe jo vetëm një armëpushim, dhe të reflektojë interesat e Ukrainës dhe jo vetëm të Rusisë. Do luftojmë për vendin tonë”, u shpreh ai.

LEXONI GJITHASHTU:

• Euroclear: Huaja për Ukrainën është e brishtë dhe rrezikon largim e investitorëve
• BE dhe G7 shqyrtojnë ndalimin e plotë të transportit të naftës ruse