Dëshmia e Covey në Hagë: Marrëdhënia Kouchner–Jackson, kyçe për Kosovën

Në Dhomat e Specializuara të Kosovës në Hagë ka vijuar sot për të dytën ditë me radhë dëshmia e diplomatit amerikan Jock Covey, i cili gjatë periudhës së pasluftës në Kosovë ka shërbyer si zëvendës përfaqësues i posaçëm i Kombeve të Bashkuara, nën drejtimin e Bernard Kouchner.

Gjatë seancës së sotme, prokuroria është fokusuar në një libër të publikuar në vitin 2005, ku Covey figuron si bashkautor. Dëshmitari bëri të ditur se ky libër ka shërbyer për të si material referues në mësimdhënie për më shumë se 15 vite, duke reflektuar përvojën e tij në misionet ndërkombëtare në Kosovë.

Një pjesë e rëndësishme e pyetjeve iu kushtua përshkrimit të marrëdhënies ndërmjet Bernard Kouchner dhe gjeneralit britanik Mike Jackson, që sipas Covey dhe bashkautorëve të librit, ka qenë një element kyç për funksionimin dhe suksesin e operacionit ndërkombëtar në Kosovë.

Në libër, vërehet se Kouchner dhe Jackson jo vetëm që kishin bashkëpunim të ngushtë dhe komunikim të rregullt, por edhe ndanin një vizion të përbashkët për drejtimin e misionit. Sipas përmbajtjes së cituar nga prokuroria në sallën e gjyqit, dy udhëheqësit ishin të një mendimi se prioriteti fillestar duhej të ishte stabilizimi ushtarak, por me kalimin e kohës ata kuptuan se KFOR-i nuk mund të përmbushte misionin e tij pa një proces politik paralel.

Covey e konfirmoi këtë analizë si të saktë dhe në përputhje me përvojën e tij personale gjatë asaj periudhe.

Ndërkohë, prokuroria e pyeti dëshmitarin edhe për një tjetër botim të lidhur me Kosovën, librin “Luftëtarët e Paqes”, shkruar nga vetë Bernard Kouchner.

“E kam blerë një kopje kohëve të fundit, e kam në gjuhën franceze, por nuk e kam lexuar”, u shpreh Covey.

LEXONI GJITHASHTU:

• Grabitja e 4.6 mln eurove në Rinas/Rrëzohet rekursi i 7 anëtarëve të grupit kriminal
• Shkodër/ 2-vjeçarja pëson djegie pasi ra në enë me ujë të nxehtë, dërgohet në QSUT