Dëshmon në Hagë ish-zëvëndësi nga Misioni i Kombeve të Bashkuara në Kosovë

Dëshmitar i thirrur nga mbrojtja e ish-presidentit Hashim Thaçi, e ka vazhduar dëshminë e tij në Hagë. Në ditën e dytë, ish-zëvendëshefi i UNMIK-ut Jock Covey, po merret në pyetje nga Prokuroria.

Ai u pyet nga Prokurorja për rolin e Azem Sylës dhe Sokol Bashotës në UÇK, më konkretisht:

“A keni dijeni mbi rolet e Azem Sylës dhe Sokol Bashotës?”. Covey nga ana tjetër u përgjigj shkurtimisht “Jo”.

Ish-numri dy i UNMIK-ut u pyet edhe rreth një rasti të shkëmbimit të të burgosurve.

“A keni dëgjuar për një rast të shkëmbimit të të burgosurve që kishte ndodhur në janar të vitit 1999-të?”, drejtohet Prokurorja.

Covey u përgjigj sërish me jo.

“Më lejoni të shtoj se në atë kohë nuk kam qenë i përfshirë, kam punuar në Universitetin e Mbrojtjes. Kam qenë duke punuar në një libër që do të shfrytëzohej nga oficerët e së ardhshmes”, u shpreh Covey.