Dështon protesta e biznesit të vogël, shoqata bëri thirrje për ulje qepenash

Bizneset e vogla dhe të mesme në Tiranë nuk iu përgjigjën ftesës për protestë të Shoqatës.

Nga një vëzhgim i Euronews Albania në terren, aktiviteti tregtar vijoi si normalisht në të gjithë kryeqytetin.

Ajo që ndryshonte në krahasim me ditët e javës ishte më pak qarkullim mjetesh e njerëzish, prej faktit që është fundjavë dhe për dallim nga fundjava e kaluar moti me shi.

Pjesa tjetër e atmosferës në rrugët dhe bizneset e Tiranës nuk krijonte përshtypjen e një dite proteste e revolte ndaj Qeverisë.

Shoqata e Biznesit të Vogël dhe të Mesëm ftoi sipërmarrësit që të ulin qepenat në shenjë proteste kundër paketës fiskale të propozuar nga Qeveria.

Shoqata kundërshton sidomos propozimin për të përfshirë në taksimin progresiv të vetë punësuarit, që janë të regjistruar si subjekt fizik që nuk paguajnë TVSh për xhiron nën 10 milion lekë dhe Tatim Fitim nën xhiron 14 milion lekë.  

LEXONI GJITHASHTU: 

• 2/3 e PPP-ve ‘në terr’, Ministria e Financave s’monitoron zbatimin e 163 kontratave
• Çmimi i energjisë, Rama: Shteti mburojë për konsumatorët familjarë dhe bizneset e vogla