Seanca gjyqësore ndaj Dritan Dajtit, i akuzuar për masakrën e 7 gushtit 2009 në Durrës, është shtyrë përsëri për shkak të problemeve teknike. Gjykata e Elbasanit nuk ka arritur të realizojë lidhjen me videokonferencë me IEVP Peqin, ndërsa Drejtoria e Përgjithshme e Burgjeve ka refuzuar shoqërimin e Dajtit në sallën e gjykatës për arsye sigurie.

Dajti, i cili është akuzuar për vrasjen e katër oficerëve të policisë, ka kërkuar nga gjykata të konstatojë dhe shpallë të pavlefshëm vendimin e Gjykatës së Krimeve të Rënda, duke argumentuar se ky vendim nuk është i plotë për shkak të mungesës së nënshkrimeve të katër anëtarëve të trupit gjykues.

Po ashtu, Dajti ka kërkuar që të shpallet përfundimi i dënimit të tij më 17 gusht 2024, dhe të lirohet nga qelia, pasi, sipas tij, po mbahet pa të drejtë në burg. Ai ka kërkuar gjithashtu që gjykata të konfirmojë se nuk ekziston një urdhër ekzekutimi për dënimin me burgim të përjetshëm.

LEXONI GJITHASHTU:

• Vrasja e 4 policëve, Gjykata e Lartë vendos burgim të përjetshëm për Dritan Dajtin
• SPAK kërkon konfiskimin e disa prej pasurive të Dritan Dajtit