Dështon seanca për Jorgo Goron, gjykata gjobit avokatin e njërit prej të pandehurve

Seanca gjyqësore për ish-kryebashkiakun e Himarës, Jorgo Goro, dhe dy ish-zyrtarë të tjerë, e planifikuar të zhvillohej sot në Gjykatën e Posaçme, është shtyrë për datën 12 mars 2025, në orën 11:00. Gjatë seancës së kësaj të mërkure, pritej të zhvillohej mbrojtja dhe të shpallej vendimi nga gjykata.

Në një vendim të veçantë, GJKKO ka dënuar me gjobë mbrojtësin ligjor të Vezir Gjikokës, duke i shqiptuar një gjobë prej 10 mijë lekësh, për shkak se ai nuk kishte informuar gjykatën për angazhimet e tjera të tij, duke bërë të pamundur paraqitjen në seancën e sotme.

Gjyqtari Ardit Mustafaj ka caktuar avokatin Jerasimo Basha për të mbrojtur Goron, pasi mbrojtësi i tij nuk ka mundur të paraqitet. Gjithashtu, për të vazhduar procesin, është caktuar avokati Artan Simoni, anëtar i Dhomës së Avokatëve të Tiranës.

Për Vezir Gjikokën, është caktuar avokatja Pranvera Docci, gjithashtu anëtare e Dhomës së Avokatëve të Tiranës.

Gjykata ka pezulluar afatet e paraburgimit për Jorgo Goron dhe ka vendosur pezullimin e masës “arrest në shtëpi” për Vezir Gjikokën, duke shtyrë seancën për javën e ardhshme.

Seanca e re do të zhvillohet më 12 mars 2025, ku pritet të vazhdojë shqyrtimi i çështjes.

LEXONI GJITHASHTU:

• SPAK mbyll hetimet për Goron dhe dy ish-zyrtarët e bashkisë Himarë, zbardhet akuzat
• Jorgo Goro del përpara gjykatës, pranohet kërkesa për gjykim të shkurtuar