“Destinacion” viziton tokat pjellore të Klosit, një vend i vogël me histori të lashtë

Nga Ilirët te koha e perandorit bizantin Justian, e më pas te Pushtimi Osman, Klosi është prekur nga rrymat e historisë. Rreth dy orë larg Tiranës, Klosi është i njohur për natyrën e gjelbër dhe pjellorinë e tokës, që e bën një vend të përshtatshëm për të jetuar, si edhe një pikë piktoreske turistike.

Në hyrje të Klosit çdo vizitor përballet me shumë vreshta e rrushi dhe pemë frutore si mollë, kumbulla, arra.

Një vend i veçantë në Klos është fshati Suç, emri i të cilit vjen nga fjala “gjakderdhje”, pasi thuhet se kohën e Pushtimit Osman, në Suç ka ndodhur një betejë e përgjakshme.

Në të majtë të rrugës, mbi kodër qëndron Kisha e Shën Nikollit, e ndërtuar në rrënojat e një kishe shumë të vjetër katolike, e cila u shkatërrua gjatë kohës së osmanëve. Në këtë vend janë zbuluar varreza monumentale, që mendohet se i përkasin epokës së Justinianit.

Por jo vetëm Suçi është fshat historik në Klos, pasi në shpellat e fshatit Skënderaj, gërmimet arkeologjike sugjerojnë se kishte varreza që i përkasin epokës së ilirëve.

Pranë rrugës kryesore, në Suç gjendet një lapidar historik, ku janë skalitur tre ngjarje të mëdha për atë krahinë: Kuvendi i Matit, në vitin 1911, Formimi i batalionit të Matit, në 1944 dhe Formimi i Këshillit drejtuar po në atë muaj, që ishte si qeveri lokale e krahinës dhe për të cilën banorët janë shumë krenarë.

LEXONI GJITHASHTU:

• “Destinacion” viziton Kryeziun e Fushë Arrëzit, vendlindjen e At Shtjefën Gjeçovit