​Detaj simbolik në Hagë: Jakup Krasniqi me kollare me shqiponjë në fjalimin para trupit gjykues

Në paraqitjen e tij para trupit gjykues në Hagë, Jakup Krasniqi u shfaq me një detaj simbolik në veshjen e tij – një kollare me shqiponja, raporton KosovaPress.

Ky paraqitje vjen vetëm një ditë pas shënimit të 18-vjetorit të Pavarësisë së Kosovës, duke i dhënë një mesazh të veçantë momentit të fjalimit të tij në sallën e gjyqit.

Në fjalën përmbyllëse në seancën e fundit në Hagë Krasniqi tha se për më shumë se pesë vjet, i është mohuar e drejta e njeriut, duke theksuar ndër më të rëndësishmen, atë për të jetuar në liri.

“Pas më shumë se pesë vjetësh burgim të padrejtë dhe, sipas mendimit tim, të panevojshëm, angazhimi im politik dhe jetësor për jetë e liri ka nisur herët. Kam qenë i angazhuar që në fillim për të dhënë një rrëfim të vërtetë të luftës sonë për pavarësi, kundër politikave të persekutimit dhe gjenocidit të regjimit serb, të cilat sollën vuajtje dhe shkatërrim të paparë për popullin e Kosovës”, u shpreh Krasniqi.