Detaje nga aksidenti te Unaza e Madhe me 2 viktima, mjeti i tonazhit të rëndë ra nga ura pas përplasjes me fuoristradën

Detaje të reja janë zbardhur nga aksidenti i rëndë i ndodhur pasditen e kësaj të mërkure në Unazën e Madhe të Tiranës, ku 2 persona kanë humbur jetën dhe 1 tjetër është plagosur.

Nga pamjet e siguruara nga Euronews dhe burime nga vendi i ngjarjes bëhet e ditur se një automjet i tonazhit të rëndë është përplasur me një automjet tip fuoristradë, e cila është shkatërruar plotësisht nga përplasja.

Pas aksidentit, mjeti i tonazhit të rëndë ka thyer barrierat mbrojtëse të urës dhe ka përfunduar duke rënë poshtë, në rrugën tjetër, duke u shkatërruar atë totalisht.

Nga burime paraprake pranë vendit të ngjarjes mësohet se, si pasojë e aksidentit, kanë humbur jetën dy personat që udhëtonin në mjetin e tonazhit të rëndë, të dy shtetas egjiptianë. Njëri prej tyre ka ndërruar jetë në vendngjarje, ndërsa tjetri është transportuar në spital në gjendje të rëndë shëndetësore, por nuk ka arritur t’u mbijetojë plagëve të marra.

I plagosur ka mbetur edhe drejtuesi i mjetit “Foristrade”, një 28-vjeçar shqiptar.

Në vendngjarje ndodhen forcat e policisë dhe ekipet e emergjencës, ndërsa vijon puna për zbardhjen e plotë të rrethanave të aksidentit.

1 / 7

Mjeti i tonazhit të rëndë thyen barrierat dhe bie poshtë te Unaza e Madhe, dyshohet për viktima pic.twitter.com/7tgIukDZvh

— Euronews Albania (@EuronewsAlbania) July 22, 2026