Detaje nga atentati në Lushnjë, plagoset me armë zjarri Juli i Pashakos

Është zbardhur ngjarja e mesditës së kësaj të marte në Lushnjë, ku burime bëjnë me dije se në shënjestër të atentatit dyshohet të ketë qenë Julian Sulo, i njohur si “Juli i Pashakos”, rival i bandës së Aldo Bares.

“Rreth orës 10:40, në afërsi të stadiumit të Lushnjës, dyshohet se shtetasi J. S., 45 vjeç, është plagosur në këmbë me armë zjarri i cili ndodhet jashtë rrezikut për jetën”, njofton policia.

Sipas burimeve të pakonfirmuara, dyshohet se të shtënat drejt 45-vjeçarit kanë ardhur nga një mjet në lëvizje, brenda të cilit ndodheshin tre persona. Pas marrjes së mjekimit në spital, ai është shoqëruar në komisariatin e policisë për të dhënë deklarimin e tij në lidhje me ngjarjen.

45-vjeçari është person me precedent penal për drogë dhe krime kundër personit. Më herët, atij i janë sekuestruar pasuri të dyshuara si të përfituara nga burime të paligjshme.

Kujtojmë që Julian Sulo është plagosur dhe më 11 qershor 2016 pas ndeshjes Shqipëri-Zvicër në një pikë bastesh nga një anëtar i bandës së Aldo Bares.

Makina e autorëve është gjetur e djegur në fshatin Lifaj, dhe brenda saj është gjetur një pistoletë.

Shërbimet e Policisë kanë ngritur pika kontrolli në hyrje-dalje të qytetit dhe po punojnë për identifikimin dhe kapjen e autorëve.

Grupi hetimor, në drejtim të Prokurorisë, po punon për zbardhjen e plotë të rrethanave të ngjarjes.

LEXONI GJITHASHTU:

• PAMJE/ Të shtëna me armë zjarri pranë kthesës së spitalit në Lushnjë
• Hera e dytë që plagoset, kush është ‘Juli i Pashakos’ dhe historiku i tij në Lushnjë