Detaje nga vrasja në Ndroq, kërkime në 2 qytete. Policia njoftim për mjetin e gjetur

Pas ekzekutimit të 50 vjeçarit Alfred Dedja, autori Julian Gjoshi u largua me automjetin tip Mercedes Benz ML në drejtim të Durrësit. Uniformat blu të qytetit bregdetar kanë gjetur mjetin e braktisur, me të cilin lëvizi autori, në afërsi të Shkëmbit të Kavajës. Grupi hetimor ka kryer ekspertizën e mjetit me qëllim përfitimin e provave të reja.

Sipas një njoftimit të policisë në mjetin e autorit nuk është gjetur asnjë send i kundërligjshëm, duke lënë të kuptohet se autori e ka marrë armën e krimit me vete gjatë largimit.

“Në vijim të kontrolleve të kryera nga shërbimet e Drejtorisë Vendore të Policisë Tiranë, në bashkëpunim me shërbimet e Drejtorisë Vendore të Policisë Durrës dhe të Forcës Kombëtare të Sigurisë, për lokalizimin dhe kapjen e autorit të vrasjes së ndodhur ditën e djeshme, në një lokal në Ndroq, është gjetur i braktisur në fshatin Shkallnur, automjeti me të cilin dyshohet se ka lëvizur autori i dyshuar i vrasjes.

Gjatë kontrollit në automjet, shërbimet e Policisë nuk kanë konstatuar ndonjë send të kundërligjshëm”, thuhet në njoftimin e policisë.

Kërkimet e policisë për kapjen e autorit të dyshuar janë përqendruar në Tiranë dhe Durrës.

Viktima dhe autori ndodheshin në të njëjtin lokal, në tavolina të ndryshme.

50-vjeçari i është drejtuar tavolinës ku ndodhej autori dhe, pas një bisede shumë të shkurtër, ky i fundit ka qëlluar për vdekje Alfred Dedjan.

Viktima dhe autori njiheshin me njëri-tjetrin, ndërsa të dy kanë qenë të armatosur, por arma është përdorur vetëm nga autori.

27-vjeçari është kunati i Altin Hajrit dhe ka pasur precedentë të mëparshëm penalë për armëmbajtje pa leje.

Emri i tij përmendet edhe në dosjen për ish-deputetin socialist Jurgis Çyrbja, ku Hajri i ka kërkuar ndihmë për ta shmangur nga përgjegjësia penale, pasi ishte i arrestuar.

Viktima, disa vite më parë, ka punuar në kompleksin në pronësi të Altin Hajrit si menaxher, periudhë në të cilën u rrëmbye Jan Prenga.

Pista kryesore është ajo e pazareve të drogës, por nuk përjashtohen as konfliktet e mëparshme që kanë pasur me njëri-tjetrin.

Viktima ka marrë në trup dy plumba, ndërsa një predhë që është gjetur në vendin e ngjarjes u çua për ekspertim në laborator.

Në pyetje për këtë ngjarje janë marrë disa persona, si ata që ishin në lokal në momentin që ndodhi vrasja, stafi i lokalit dhe familjarët e tyre.

LEXONI GJITHASHTU:

• Si nisi konflikti në Ndroq? Detaje të tjera nga vrasja e Alfred Dedjas
• Vrasja në Lokalin në Ndroq, reagon policia e Tiranës! Kush është autori i dyshuar?