Detajet e aksidentit në Tiranë, momenti kur 7-vjeçari përplaset për vdekje nga 2 automjetet

Një fëmijë 7-vjeçar u përplas për vdekje nga dy automjete mesditën e së martës teksa ishte duke lypur në rrugën “Kastriotët”, në Tiranë.

Euronews Albania ka siguruar pamje nga momenti i ngjarjes së rëndë. I mituri shihet pranë automjetit, që sipas pamjeve të marra nga kamerat e sigurisë drejtohej nga shtetasi Tomorr Shukulli, tashmë i arrestuar.

Ky i  fundit ka dhënë lekë të miturit, të cilit i kanë rënë në tokë dhe është ulur për t’i marrë.

Dyshohet se drejtuesi i mjetit nuk e ka parë dhe e ka përplasur. Drejtuesja e dytë e mjetit Valentina Koltraku dyshohet se i ka dhënë goditjen fatale.

7-vjeçari u shoqërua menjëherë në spital, por nuk mundi t’i mbijetonte plagëve të marra dhe ndërroi jetë.

Policia arrestoi mbrëmjen e së martës 2 drejtuesit e mjeteve Valentina Selman Koltraku, 42 vjeçe dhe Tomorr Kostandin Shukulli, 55 vjeç, të cilët u larguan nga vendi i ngjarjes pasi përplasën të miturin.