Detajet nga Vlora, autori goditi me thikë dy të rinj në zona të ndryshme të qytetit

Dy të rinj u plagosën mbrëmjen e së shtunës në Vlorë, ndërsa në një njoftim të saj këtë të dielë, policia ka zbardhur të gjitha detajet e ngjarjes.

Sipas policisë, një 32-vjeçar ka plagosur me thikë dy persona në vende të ndryshme të qytetit, pasi është konfliktuar me ta.

“U arrestua në flagrancë 32-vjeçari I. H., banues në Vlorë, me akuzën për veprën penale ‘Plagosje e rëndë me dashje’, pasi dyshohet se, për motive të dobëta, është konfliktuar fizikisht, në lagjen ‘10 Korriku’ dhe në lagjen ‘Pavarësia 2’, me dy shtetas të ndryshëm, të cilët gjatë konfliktit i ka dëmtuar me mjet prerës (thikë)”, thuhet në njoftimin e policisë.

Shtetasit e dëmtuar, M. F., 39 vjeç dhe K. K., 32 vjeç, kanë marrë ndihmën mjekësore dhe ndodhen jashtë rrezikut për jetën. Gjithashtu, edhe shtetasi i arrestuar I. H. ka marrë ndihmën mjekësore për dëmtimet e marra gjatë konfliktit.

Policia thotë se zbardhi ngjarjen, bazuar edhe në pamjet filmike të siguruara nga vendi i ngjarjes, duke mundësuar dokumentimin e plotë të provave mbi konfliktin e ndodhur.

Ndërkohë, në cilësinë e provës materiale, u bë sekuestrimi i mjetit prerës (thikë) të përdorur nga shtetasi I. H.

LEXONI GJITHASHTU:

• PAMJE/ Dy të plagosur pas përleshjes me thika në Vlorë, shoqërohen disa persona
• Sherr me thika mes të rinjve në Vlorë, dy të plagosur përfundojnë në spital