Dhëndrit të Trump i jepet statusi i investitorit strategjik për resortin në Sazan

Komiteti i Investimeve Strategjike i drejtuar nga kryeministri Edi Rama i dha statusin investitor strategjik kompanisë së lidhur me Jared Kushner për ndërtimin e një resorti turistik në ishullin e Sazanit.

Vendimi u mor nga Komiteti i Investimeve Strategjike, KIS, i drejtuar nga kryeministri Edi Rama më 30 dhjetor, duke pranuar propozimin e kompanisë Atlantic Incubation Partners LLC dhe t’i japë asaj status të investitorit strategjik me procedurë të veçantë.

Sipas vendimit të KIS, në ishull parashikohet një investim prej 1.4 miliardë eurosh dhe ndërtimi parashikohet të shtrihet në 8 për qind të ishullit ose 45 hektarë.

“Vlera e investimit të projektit turistik “Resorti Turistik – Ishulli i Sazanit” i plotëson kriteret e parashikuara nga legjislacioni për investimet strategjike dhe parashikohet të jetë 1.4 miliardë Euro”, thuhet në vendimin e KIS.

Në vendim renditen hapat konkretë që do të ndërmerren nga institucionet shtetërore në Shqipëri për të ndihmuar kompaninë në sigurimin e pronës, dokumentacionin e nevojshëm dhe veprime të tjera që pritet të përmbyllen në tre muajt në vijim. Kompania nga ana tjetër do duhet të nënshkruajë një kontratë me Korporatën e Investimeve Strategjike dhe Albanian Seaports Development Company sh.a dhe do duhet të sigurojë me investimin e vet ujin, energjinë e të ngjashme.

Statusi jepet për një periudhë 10-vjeçare dhe ndërtimi parashikohet të jetë i ndarë në tre faza, bëhet me dije në vendim.

LEXONI GJITHASHTU:

• Senati amerikan heton lidhjet e zyrtarëve serbë e shqiptarë me projektet e Kushner
• Sazani kushton 930 mln €| Konfirmohet projekti i Kushner, do ndërtojë hotel dhe vila