Dhërmi|Ndihmuan autorin për të fshehur trupin e recepsionistit, arrestohen 2 persona

Dy persona kanë rënë në prangat e Policisë, lidhur me ngjarjen e rëndë të ndodhur ditën e djeshme në Dhërmi, ku dyshohet se u vra me armë zjarri 31-vjeçari Eraldo Nevruzi.

Përmes një njoftimi, Policia bën të ditur se këta dy persona, Daniel Qose dhe David Larti, janë punonjësit e hotelit ku ndodhi ngjarja dhe u arrestuan nën akuzën për ndihmë ndaj autorit Gerald Shehu për fshehjen e trupit të viktimës, që nuk është gjetur ende.

Ndërsa nga këqyrja e banesës ku qëndronte autori, në një kasafortë në dhomën e gjumit, shërbimet e Policisë gjetën 1 fishek arme zjarri, me kapsollë të goditur, i cili u dërgua në Institutin e Policisë Shkencore, për ekzaminim.

Njoftimi i Policisë:

Identifikohen, kapen dhe vihen në pranga 2 shtetas, të cilët dyshohet se ndihmuan autorin e ngjarjes kriminale të ndodhur ditën e djeshme, në Dhërmi, për të fshehur trupin e pajetë të shtetasit E. N.

Nga veprimet hetimore të kryera për zbardhjen e plotë të ngjarjes, dyshohet se autori, shtetasi G. Sh., pasi e ka vrarë me armë zjarri shtetasin E. N., është ndihmuar për të fshehur trupin, nga 2 punonjës të hotelit të tij, shtetasit D. Q., 33 vjeç dhe D. L., 30 vjeç, të dy banues në Korçë.

Nga këqyrja e banesës ku qëndronte shtetasi G. Sh., në një kasafortë në dhomën e gjumit, shërbimet e Policisë gjetën 1 fishek arme zjarri, me kapsollë të goditur, i cili u dërgua në Institutin e Policisë Shkencore, për ekzaminim.

Në fuksion të hetimeve të thelluara u fiksuan dhe u morën për ekzaminime të mëtejshme, sende dhe mjete të tjera të cilat dyshohet se janë përdorur në këtë ngjarje.

Hetimet vijojnë në drejtimin e Prokurorisë.

Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Vlorë, për shtetasin G. Sh., për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”, si dhe për shtetasit D. Q. dhe D. L., për veprën penale “Fshehja ose asgjësimi i kufomës”, kryer në bashkëpunim.

LEXONI GJITHASHTU:

• Ndërroi turnin me 31-vjeçarin para vrasjes, flet recepsionistja e hotelit në Dhërmi
• Ekskluzive| Euronews siguron foton e autorit që dyshohet se vrau recepsionistin