Dhoma e Përfaqësuesve në Shtetet e Bashkuara të Amerikës do të hapë një hetim zyrtar për shkarkimin e Presidentit Joe Biden, njoftoi sot republikani Kevin McCarthy.
Ai deklaroi se hetimi do të përqendrohet në “akuzat për shpërdorim të pushtetit, pengim dhe korrupsion” nga zoti Biden.
Republikanët kanë hetuar presidentin që kur morën kontrollin e Dhomës në janar. Seancat dëgjimore nuk kanë gjetur asnjë provë konkrete kundër Biden, megjithatë, ato kanë hedhur më shumë dritë mbi marrëdhëniet e biznesit të djalit të presidentit, Hunter Biden.
Shtëpia e Bardhë reagoi menjëherë kundër vendimit të Republikanëve.
Hunter Biden është aktualisht nën hetim federal për krime të mundshme tatimore që lidhen me interesat e tij me biznese jashtë vendit.
Njoftimi i së martës është hapi i parë në një proces politik që mund të rezultojë në një votim në Dhomën e Përfaqësuesve. Nëse fajësimi i presidentit miratohet me një shumicë të thjeshtë, vendimi kalon në Senatin Amerikan.
LEXONI GJITHASHTU:
- Hunter Biden do të përballet me një aktakuzë të re
- Zonja e Parë në SHBA infektohet sërish me Covid-19, “frikë” për Biden