Dhuna ndaj Mëngjesit, avokati: Pasi u zgjidhi çështjen, e rrahën! Akt burracak

Avokati Gentian Rumano është shprehur se dhuna ndaj avokatit Sokol Mëngjesi është një akt burracak që nuk tregon aspak burrëri.

Komentet Rumano i bëri në emisionin “Now me Erla Mëhillin” në Euronews Albania, ku tha se dhunimi i tij erdhi pasi avokati Sokol Mëngjesi u zgjidhi çështjen e pronësisë.

Ai shtoi se autorët e sulmit ndaj tij nuk ishin në gjendje që të merreshin me palën kundërshtare dhe gjetën hallkën më të dobët për të sulmuar, pikërisht avokatin Mëngjesi.

“Ti urojmë shërim të shpejtë profesorit. Koli është mik i imi dhe i gjithë kolegëve. Një njeri që gjithmonë ka transmetuar dashuri. Kjo ngjarje nuk ka prekur vetëm Kolin. Të gjithë avokatët kanë pasur qëndrimin e tyre për këtë ngjarje të rëndë. E kemi parashikuar që të rrezikuar kanë qenë edhe avokatët. Ngjarja e sotme është shumë e rrezikshme.

Palët nuk i zgjidhin mes vetes, por gjejnë atë që është hallka më e dobët, që janë avokatët. Ne jemi të fortë mendërisht, me argumenta, por nuk jemi të fortë fizikisht për t’i bërë ballë një sulmi të kësaj natyre.

Këta palë që godasin avokatin, pra pala e vetë, nuk e kanë gjetur forcën që të godasin kundërshtarin që kanë pasur përballë në gjykim, por pasi zgjidhën problemet dhe fituan çështjen përmes avokatit, sepse avokati është ai që i zgjidh çështjet, gjejnë hallkën më të dobët dhe e godasin avokatin. Kjo nuk është burrëri, por akt burracak”, tha Rumano.

LEXONI GJITHASHTU:

• EMRAT| Dhunuan me leva avokatin Sokol Mëngjesi, identifikohen 4 autorët
• Dhuna ndaj avokatit të Berishës, ministri Manja: Meriton ndëshkimin e drejtësisë!