Dhunoi kamarierin se ngatërroi porosinë, pezullohet nënkomisari i policisë në Vlorë

Një oficer policie i cili u filmua teksa bashkë me një person tjetër dhunonte një kamerier në një hotel të njohur në qytetin e Vlorës, është pezulluar nga detyra.

Përmes një njoftimi për mediat policia bëri me dije se “pas përfshirjes jashtë orarit të shërbimit në një konflikt fizik, në ambientet e një lokali në lagjen “Pavarësia 2”, Vlorë, Drejtori i Përgjithshëm i Policisë së Shtetit, Ilir Proda, ka urdhëruar pezullimin e menjëhershëm nga detyra, deri në sqarimin e plotë të rrethanave, të oficerit të Policisë Kufitare Dibër”.

“Ndërkohë, Drejtoria e Standardeve Profesionale në Policinë e Shtetit ka nisur ndaj Nënkomisar Ardian Isufi, me detyrë Oficer Policie në Komisariatin e Policisë Kufitare Dibër, procedurën disiplinore të rëndë, bazuar në Ligjin nr. 82/2024 “Për Policinë e Shtetit”, që parashikon masa për: raste të sjelljeve që diskreditojnë imazhin dhe dëmtojnë besimin e publikut tek Policia e Shtetit, të kryera jashtë ushtrimit të detyrës; kryerjen e veprimeve që cenojnë rëndë figurën e punonjësit të policisë, institucionit apo shërbimit policor në tërësi.

Nga veprimet e para hetimore ka rezultuar se Nënkomisar Ardian Isufi, jashtë shërbimit dhe në shoqërinë e shtetasit L. B., 57 vjeç, banues në lagjen “Pavarësia”, Vlorë, është konfliktuar fillimisht fizikisht me shtetasin A. B., 18 vjeç. Pas përshkallëzimit të konfliktit, janë përfshirë edhe shtetasit V. B., 53 vjeç, pronar i një hoteli në lagjen “Pavarësia 2”, dhe E. M. Aktualisht, Nënkomisar Ardian Isufi ndodhet i shtruar në Spitalin Rajonal Vlorë”, bëri me dije policia.

Bëhet fjalë për ngjarjen e rëndë të ndodhur mbrëmjen e djeshme në Vlorë, ku një i mitur që punonte si kamarier në një hotel të njohur në këtë qytet është dhunuar nga oficeri i policisë dhe një person tjetër për një ngatërresë me porosinë.

LEXONI GJITHASHTU:

• Ngatërroi porosinë, kamarieri sulmohet brutalisht në hotelin e njohur në Vlorë
• Vlorë: Kabllo elektrike bie në masë, jep shkëndija pranë vendkalimit të këmbësorëve